राज्य रा आतूणी हलकां रा सरहदी ज़िलां मांय मंगलवार ऊं जोरदार बायरो बाजण अर बादळा मण्ड्या रेहवण रा आसार है। आवता दो दिन मांय पारा मांय खास बदलाव रा आसार नी है। ईं पाछे तापमान मांय दो ऊं तीन डिग्री सेल्सियस तांई री कमी आ सके है। ईं बीचे, आज सवाईमाधोपुर अर झालावाड समेत केई ठौड़ां पारो चढ़ जावण ऊं गर्मी रो असर तेज व्हे ग्यो। लारला 24 घंटा मांय बाड़मेर मांय पारो 40 डिग्री सेल्सियस ने पार कर ग्यो। म्हाणा खबरनवीस बतायो के मार्च महीना मांय ई गर्मी रो असर तेज़ व्हेवण लाग्यो है। जैसलमेर मांय 39 दशमलव 8, जालौर मांय 38 दशमलव 8 अर जोधपुर मांय 38 दशमलव 1 डिग्री सेल्सियस अधिकतम तापमान दर्ज करी ज्यो। भीलवाड़ा, कोटा, चित्तौडगढ़, बीकानेर, चूरू, श्रीगंगानगर, धौलपुर, नागौर, सिरोही, फतेहपुर, दौसा अर पाली मांय ई अधिकतम तापमान 36 डिग्री सेल्सियस ऊं ऊंचो दर्ज करी ज्यो।