राज्य मांय शुक्रवार ने नौरता री आठम अर नवमी रे मौके कन्या पूजन अर दूजा धार्मिक अनुष्ठान करी ज्या। झालावाड़ मांय मुकन्दरा री डूंगरियां मांय असनावर कने माँ रातादेवी, दूधा खेड़ी अर मिश्रोली रा माता जी रा मिंदरा मांय मोटी तादाद मांय जातरू पूग्या। वठे मेळा ई भर रह्या है। म्हाणा खबरनवीस बताये के ज़िला मांय न्यारी-न्यारी ठौड़ा गरबा खेल्या जा रह्या है। जयपुर मांय आमेर री शिला माता मिंदर मांय ई मोटी तादाद मांय जातरू पूग रह्या है। करौली ज़िला री नामी शक्तिपीठ कैला देवी मांय चाल रह्या मेळा मांय आज लाखां रा तादाद मांय जातरू पूग्या। पाली मांय बड़ी ब्रह्मपुरी मांय मां अम्बे रा मिंदर मांय महिलावां कळश अर वां माथे ज्योत जळा र गरबा कीना। टोंक रा सुभाष बाजार मांय कन्या पूजन रो कार्यक्रम राख्यी ज्यो। सवाईमाधोपुर ज़िला मांय ई माता ने खीर अर हलवा-पूरी रो भोग लगायी ज्यो अर कन्या पूजन रा कार्यक्रम राख्यी ज्या। ज़िला रा ऐतिहासिक कंकाली माता मिंदर मांय खास सोहवणी झाँकी सजाई ज्यी। जैसलमेर मांय ई गजटेड हनुमान मिंदर मांय कन्या पूजन रो कार्यक्रम राख्यी ज्यो। बाड़मेर ज़िला रा वीरातरा मांय वाकल माता रो मेळो भर रह्यो है, जिण मांय मोटी तादाद मांय नुवा परण्या जोड़ा अर जातरू पूग्या। वठे कन्या पूजन रा कार्यक्रम ई राख्यी ज्या। बांसवाड़ा री नामी शक्तिपीठ त्रिपुर सुंदरी मिंदर मांय मोटी तादाद मांय जातरू दर्शन सारू पूग्या। श्रीगंगानगर ज़िला रा न्यारा-न्यारा मिंदरां अर घरां मांय मां भवानी री खास पूजा अर्चना, हवन-यज्ञ अर कन्या पूजन रा कार्यक्रम राख्यी ज्या। सिरोही ज़िला मांय ई न्यारा-न्यारा मिंदरां अर घरां मांय मां भवानी री खास पूजा-अर्चना अर हवन-यज्ञ रा कार्यक्रम राख्यी ज्या। शाहपुरा जिला री नामी शक्तिपीठ धनोप माता मिंदर मांय ई आज मोटी तादाद मांय जातरू दर्शन कीना। उदयपुर रा मिंदरां मांय ई ईं मौके खास धार्मिक कार्यक्रम अर कन्या पूजन रा कार्यक्रम राख्यी ज्या। चूरू मांय आज दुर्गाष्टमी रे मौके कन्या पूजन करी ज्यो।