राज्य मांय पश्चिमी विक्षोभ रा असर ऊं व्ही हल्की बारिश रे कारण ओजू ठण्ड रो असर बध ग्यो है अर दिन री बगत पारो थोड़ो उतर्यो है। मौसम केन्द्र जयपुर रे मुजब उत्तरी हवा रा असर ऊं आवता दो दिन पारो दो ऊं तीन डिग्री सेल्सियस तांई और उतरण ऊं सुबह-शाम सर्दी बधवा री संभावना है। ईं दौरान शेखावाटी हलका मांय कठे-कठे शीतलहर रा आसार है। बुधवार ने सब ऊं कम 3 दशमलव 9 डिग्री सेल्सियस न्यूनतम तापमान सीकर ज़िला रा फतेहपुर मांय दर्ज करी ज्यो। हनुमानगढ जिला रा संगरिया मांय 4, नागौर मांय साढे 4 अर बीकानेर ज़िला रा लूणकरणसर मांय साढे़ 5 डिग्री सेल्सियस कम ती कम तापमान नापी ज्यो। सीकर, चित्तौडगढ़, करौली, दौसा, चूरू, जालौर, पिलानी अर डबोक मांय ई न्यूनतम तापमान 10 डिग्री सेल्सियस ऊं नीचे रह्यो। ईं बीचे लारला चौबीस घंटा मांय प्रदेश मांय दिन री बगत तापमान 30 डिग्री सेल्सियस ऊं नीचे दर्ज करी ज्यो।