राज्य मांय दिसम्बर महीना मांय व्हेवण वाळी राइजिंग राजस्थान इन्वेस्टमेंट समिट ने ध्यान राखता थकां जिला स्तर माथे ई निवेशकां रा सम्मेलन राख्या जा रह्या है। चित्तौड़गढ़ मांय राख्यी ज्यी राइजिंग राजस्थान इनवेस्टर्स मीट मांय 8 हजार 345 करोड़ रुप्या रा निवेश रा 228 प्रस्ताव मिल्या। आं रे जरिए 18 हजार ऊं बत्ता लोगां ने नौकरी-धंधा मिलेला। चित्तौड़गढ़ रा प्रभारी उपमुख्यमंत्री डॉ. प्रेमचंद बैरवा वर्चुअल तरीकां ऊं सम्मेलन ने सम्बोधित कीनो। वे कह्यो के निवेशक चित्तौड़गढ़ मांय कारखाना लगा र जिला रा विकास ने और तेज़ करेला। कार्यक्रम मांय नान्ही फिल्म बतायी ज्यी अर न्यारा-न्यारा सामान री प्रदर्शनी लगायी ज्यी। ब्यावर मांय गुरूवार ने राख्यी ज्या सम्मेलन मांय 2 हजार 845 करोड़ रुप्या रा निवेश रा करार करी ज्या, जिण ऊं 8 हजार ऊं बत्ता लोगां ने नौकरी-धंधा मिलण रा आसार है। सम्मेलन मांय प्रभारी मंत्री झाबर सिंह खर्रा कारोबारियां ने राज्य सरकार कानी ऊं कारोबार ऊं जुड़ी न्यारी-न्यारी समस्यावां आगी करण रो भरोसो दिरायो।