राज्य मांय गुरूवार ऊं एक और पश्चिमी विक्षोभ रा असर ऊं जयपुर, कोटा अर भरतपुर संभाग मांय बादळा मंड्या रेहवण अर कठे-कठे तेज बायरा सागे हल्की बारिश रा आसार है। ईं बीचे घणखर ठोड़ां गर्मी रो असर बध रह्यो है। लारला चौबीस घंटा मांय बाड़मेर मांय पारो 40 डिग्री सेल्सियस ने पार कर ग्यो। जालौर, जोधपुर, जैसलमेर अर चित्तौडगढ़ मांय ई दिन री बगत तापमान 38 डिग्री सेल्सियस ऊं ऊंचो रह्यो। पांच अप्रैल ऊं बाड़मेर अर जैसलमेर समेत कठे-कठे लू बाजण रा आसार है। ईं बीचे उनाळा री सरूआत सागे ई चिकित्सा विभाग सावचेत व्हे ग्यो है। मौसमी बीमारियां रा मरीजां मांय बधोतरी री शंका ने ध्यान राखता थकां अस्पतालां मांय व्यवस्थावां चाक-चौबंद करी जा रही है। चिकित्सा मंत्री गजेन्द्र सिंह खींवसर वीडियो कॉन्फ्रेंस रे मार्फत चिकित्सा अर चिकित्सा शिक्षा ऊं जुड्या आला अहलकारां सागे मीटिंग कीनी। वे मौसमी बीमारियां रा मरीजां री बधती तादाद ने ध्यान राखता थकां अस्पतालां मांय सगळा ज़रूरी इन्तजामात् तैय करण रा हुकम दीना।