राज्य मांय गहलोत राज मांय बणायी ज्या नुवा जिलां मांय ऊं नौ ज़िला खत्म करण जदके आठ ज़िला बरकरार राखण रो फैसलो करी ज्यो है। मुख्यमंत्री भजनलाल शर्मा री सदारत मांय थावर ने मुख्यमंत्री रा दफ्तर मांय व्ही मंत्रिपरिषद री मीटिंग मांय ओ फैसलो करी ज्यो। मीटिंग मांय सीकर, पाली अर बांसवाड़ा ने दियो ज्यो संभाग रो दर्जो ई रद्द करण रो फैसलो करी ज्यो। संसदीय कार्यमंत्री जोगाराम पटेल अर खाद्य मंत्री सुमित गोदारा मीटिंग मांय करी ज्या फैसलां री जाणकारी दीनी। वे बतायो के दूदू, केकड़ी, शाहपुरा, नीमकाथाना, सांचौर, अनूपगढ़, जयपुर ग्रामीण, जोधपुर ग्रमीण अर गंगापुरसिटी रो ज़िला रो दर्जो पाछो ले लियो जावेला। बालोतरा, ब्यावर, डीग, डीडवाना-कुचामन, कोटपूतली-बहरोड़, खैरथल-तिजारा, फलौदी अर सलूम्बर जिला बण्या रेहवेला। ईं फैसला पाछे अब प्रदेश मांय 7 संभाग अर 41 ज़िला रेहवेला। श्री पटेल कह्यो के हटावण वाळा ज़िला राज्य माथे गैर-ज़रुरी भार डाल रह्या हा। वे कह्यो के नुवा बणायी ज्या ज़िलां रा बारा मांय ओजू विचार करण सारू बणायी ज्यी समिति री सिफारिश परां आं ज़िला ने निरस्त करण रो फैसलो करी ज्यो। दूजी कानी राज्य रा पैली वाळा मुख्यमंत्री अशोक गहलोत खबरनवीसां सागे बातचीत करता थकां कह्यो के वां रा राज मांय आबादी अर सुशासन ने ध्यान राखता थकां नुवा ज़िला बणायी ज्या हा। मीटिंग मांय करी ज्या फैसलां री जाणकारी देता थकां मंत्री गोदारा खबरनवीसां ने बतायो के खाद्य सुरक्षा योजना मांय नुवा पात्र लोग जोड़्या जावेला। वे बतायो के खाद्य सुरक्षा योजना रो फायदो लेवण वाळां ने केवाईसी करावण सारू तीन महीना और देवण रो फैसलो करी ज्यो है। कैबिनेट री मीटिंग मांय कुछ और फैसला ई करी ज्या। आं रे मुजब राज्य मांय ग्राम पंचायतां रो ओजू गठन कर्यो जावेला। मीटिंग मांय समान पात्रता परीक्षा रा नतीजा री वैधता री मियाद तीन साल करण अर आवता चार साल मांय तीन लाख सरकारी नौकरियां देवण रा फैसला ई करी ज्या। परिनिंदा दंड खत्म करण अर पशुधन सहायकां रा पदनाम मांय बदलाव ने ई मंजूरी दीरीजी।