राज्य मांय करीब दो सप्ताह पाछे चैमासा री बिरखा ओजू व्हेवण लागी है। लारला 24 घंटां मांय केई ठौड़ां बिरखा व्ही। सीकर मांय मोेड़ी रात सरू व्ह्यो बरसात रो सिलसिलो आज सवारे तांई चालतो रह्यो। सीकर ज़िला रा गांवांई हलकां मांय 11 सेंटीमीटर ऊँ बत्तो पाणी बरस्यो। झालावाड़ ज़िला रा मनोहरथाना मांय व्ही बरसात ऊँ परवन नदी उफणबा लागी है। बारां ज़िला मांय ई आज करीब डोढ़ घंटा तांई ज़ोरदार मेह बरस्यो। भरतपुर मांय संवारे ऊं ई बिरखा व्हे रही है। कोटा ज़िला रा गांवांई हलकां मांय ई झमाझम बारिश व्ही। झुन्झुनू, चूरू, कोटपूतली-बहरोड़ अर डीडवाना-कुचामन ऊँ ई बिरखा व्हेवण रा समाचार मिल्या है। मौसम विभाग आज 33 ज़िलां मांय बारिश रो यलो अलर्ट जारी कीनो है। चैमासा री बिरखा ओजू ज़ोर पकड़बा ऊँ राज्य रा खास बंधां मांय ई पाणी आवण लाग्यो है। बीसलपुर बंधो बूता रो 66 फीसदी ऊँ बत्तो भर ग्यो है, जद के राणाप्रताप सागर अर जवाहर सागर बंधा मांय ई पाणी रो लेवल लगातार बध रह्यो है।