राज्यपाल हरिभाऊ बागड़े किसानां ऊं कुदरती तरीका ऊं खेती करण बाबत् कह्यो है। वे थावर ने सीकर जिला रा खाटूश्याम जी मांय बजाज फाउंडेशन कानी ऊं राख्यी ज्यी सुभाष पालेकर कृषि कार्यशाला मांय बोल रह्या हा। वे रसायन रहित खेती सागे कम ती कम खर्च , बत्ती उपज, उच्च गुणवत्ता अर साफ़ पर्यावरण सारू कुदरती तरीका ऊं खेती करण माथे जोर दीनो। राज्यपाल पाणी बचावण माथे खास ध्यान देवण बाबत् ई कह्यो। राज्यपाल किसानां सागे उन्नत खेती रा बारा मांय बातचीत कीनी। 6 अक्टूबर तांई चालण वाळा ईं शिविर मांय देश रा 13 राज्यां रा करीब 1 हजार प्रगतिशील किसान सिरकत कर रह्या है।