राज्यपाल हरिभाऊ बागडे कयो है कि नेत्रदान महादान है। इण रे खातिर बत्ती ऊं बत्ती लोगां ने प्रेरित कर्यो जावे। वणा कयो कि देश मांय लगे-टगे सवा करोड़ लोग दृष्टिहीन हैं। अंधता निवारण मांय नेत्रदान री संस्कृति विकसित करणे मांय सगळा साथ देवे। श्री बागडे आज ’आई बैंक सोसायटी आफ राजस्थान’ री कानी सूं राख्यी ज्यी ’नेत्रदानी परिवार सम्मेलन समारोह’ मांय बोल रिया हा। वणा नेत्रदान सूं जुड्या पिरवारां रो अभिनंदन अर स्वागत करता थकां वां ने सम्मानित भी कर्यो। वणा कयो कि मरणे सूं पैल्यां नेत्रदान रो संकल्प कर यदि मिनख आपरी आंख्यां दान कर जावे तो देश रा सगळा नेत्रहीन मिनखा ने एक ही बरस मांय आंख्या मिल जावेली। जळसा मांय ’आई बैंक सोसायटी ऑफ राजस्थान’ रा अध्यक्ष डॉ. बी.एल. शर्मा नेत्रदान जागरूकता खातिर कर्या जा रह्या जतनां रे बारे मांय विस्तार सूं जाणकारी दीनी। वठी ने जयपुर रा इन्दिरा गांधी पंचायतीराज संस्थान मांय राख्यी ज्या समता जळसा मांय भी राज्यपाल शिरकत करी । वणा समता रा भाव सूं सगळा ने देखणे अर छुआछूत नी करणे री अरज करी। इण रे चालता श्री बागडे संविधान निर्माण मांय योगदान देवण वाळा महापुरुषां ने याद करता थकां भारत ने ओजू विश्व गुरु बणावण खातिर काम करणे माथे जोर दियो।