राज्यपाल हरिभाऊ बागडे़ विश्वविद्यालयां ऊं किसानां रा भला सारू खेती-बाड़ी री नुवी प्रौद्योगिकी विकसित करण सागे शोध करण बाबत् कह्यो है। वे थावर ने उदयपुर मांय महाराणा प्रताप कृषि अर प्रौद्योगिकी विश्वविद्यालय रा दीक्षांत समारोह मांय बोल रह्या हा। राज्यपाल प्राकृतिक खेती रा विकास रे जरिये देश ने आगे बधावण माथे ज़ोर दीनो। श्री बागड़े रासायनिक खेती ऊं व्हेवण वाळा नुकसान री चर्चा करता थकां नौजवानां ऊं प्राकृतिक खेती करण री अपील कीनी। वे पाणी री बर्बादी रोकण माथे ई ज़ोर दीनो। कार्यक्रम मांय राज्यपाल महाराणा प्रताप कृषि अर प्रौद्योगिकी विश्वविद्यालय रा एक हजार ऊं बत्ता विद्यार्थियां ने उपाधियां अर तमगा दे र नवाज़ा। राज्यपाल उदयपुर मांय राजस्थान पशु चिकित्सा अर पशु विज्ञान विश्वविद्यालय रा तैत बणायी ज्या नवानिया कॉलेज मांय अतिथि गृह, चारदीवारी अर कॉलेज परिसर रा शिव मंदिर ऊं जोरजी का खेड़ा तांई सड़क बणावण रा काम री सरूआत ई कीनी। राज्यपाल उदयपुर मांय शिल्पग्राम महोत्सव री सरूआत कीनी। जळसा मांय नामी भवाई लोक नर्तक डॉ. रूप सिंह शेखावत अर कठपुतली कलाकार गणपत सखाराम मसग ने डॉ. कोमल कोठारी लाईफटाइम अचीवमेन्ट अवार्ड ऊं नवाज़ा जावेला। पश्चिम क्षेत्र सांस्कृतिक केन्द्र री ओर ऊं राख्यो जा रह्यो ओ उत्सव तीस दिसंबर तांई चालेला।