मौजूदा विधानसभा रो तीजो सत्र शुक्रवार ने राज्यपाल हरिभाऊ बागडे़ रा अभिभाषण सागे सरू व्ह्यो। अभिभाषण मांय राज्यपाल प्रदेश री मौजूदा सरकार रा एक साल रा कामकाज रो ब्यौरो दीनो। वे सरकार री उपलब्धियां रो जिक्र करता थकां कह्यो के सरकारी री कोशिशां ऊं समाज रा हर तबका रो विकास व्ह्यो है। राज्यपाल कह्यो के सरकार नौजवानां, किसानां अर महिलावां रा विकास माथे खास ध्यान दे रही है। वे कह्यो के प्रदेश मांय स्वास्थ्य सेवावां ने मजबूत बणावण माथे ई राज्य सरकार रो खास ध्यान है। लारला दिना व्ह्या राइजिंग राजस्थान ग्लोबल इन्वेस्टमेंट समिट रो जिक्र करता थकां श्री बागडे़ कह्यो के ओ देश रा औद्योगिक अर माली विकास मांय मील रो पत्थर साबित व्हेला। वे राज्य री पैली वाळी सरकार रा काम-काज रो जिक्र करता थकां कह्यो के जल जीवन मिशन घोटाळा अर पेपर लीक रा वाकयां ऊं राज्य रो नाम खराब व्ह्यो है। श्री बागड़े कह्यो के राज्य री लारली सरकार ईआरसीपी रा काम ने अटकावण री कोशिश कीनी। राज्यपाल रा अभिभाषण रे दौरान प्रदेश कांग्रेस अध्यक्ष गोविन्द सिंह डोटासरा कह्यो के सरकार बैठकां नी करे है, इंर् परां राज्यपाल कह्यो के जनजातीय हितां ऊं जुड़ी बैठकां वां री ज़िम्मेदारी है अर वे इण ने पूरी करेला। कांग्रेस रा विधायक मुकेश भाकर रो विधानसभा ऊं निलम्बन ई शुक्रवार ने खत्म कर दियो ज्यो। मुख्य सचेतक जोगेश्वर गर्ग इण रो प्रस्ताव रख्यो जिण ने सदन मंजूर कर लीनो। राज्यपाल रा अभिभाषण पाछे सदन मांय शुक्रवार न घणो काम-काज नी व्ह्यो। राज्यपाल ऊं मंजूरी सारू बिल अर तीन अध्यादेश सदन सामी पेश करी ज्या। ईं पाछे विधानसभा री कार्यवाही 3 फरवरी तांई टाळ दीरीजी। विधानसभा रो बजट सत्र दो चरणां मांय चालेला। शुक्रवार सरू व्ह्यो पहलो दौर सात फरवरी ने पूरो व्हेला, ज्यीं पाछे दूजो दौर 19 फरवरी ऊं सरू व्हेला। वां ई दिन राज्य रो बजट पेश कर्यो जावेला। इंर् पाछे खबरनवीसां सागे बातचीत करता थकां संसदीय कार्यमंत्री जोगाराम पटेल कह्यो के राज्यपाल रा अभिभाषण मांय सरकार री नीतियां अर सोच ने सदन सामी रखी ज्या। वे कह्या के राज्य री मौजूदा सरकार माथे विपख हाल तांई कोई आरोप नी लगायो है। सदन मांय विपख रा नेता टीकाराम जूली खबरनवीसा सागे बातचीत रे दौरान कह्यो के सदन मांय जनता ऊं जुड़्या मुद्दा माथे चर्चा व्हेवणी चाहिजे। वे कह्यो के सरकार री कथनी अर करणी मांय फर्क है।