राज्यपाल हरिभाऊ बागडे़ बिरखा रो पाणी बचावण सारू बत्तो ऊं बत्तो काम करण अर कृषि विश्वविद्यालयां मांय इण ऊं जुड़्या शोध अर अनुसंधान ने बधावो देवण माथे ज़ोर दीनो है। वे शुक्रवार ने श्री कर्ण नरेन्द्र कृषि विश्वविद्यालय, जोबनेर रा बारहवां स्थापना दिवस रे मौक राख्यी ज्या कार्यक्रम मांय बोल रह्या हा। राज्यपाल कह्यो के किसानां भला सारू उत्पादन, ग्रेडिंग अर पैकिंग रा काम घर मांय ई करण री सिखावण देवणी चाहिजे। वे कह्यो के खेतां मांय रासायनिक खाद इस्तेमाल करण ऊं मिट्टी री उपज री ताकत कम व्हे रही है अर रासायनिक खाद काम ले र हासिल करीजी उपज काम लेवण ऊं कैंसर सरीखी बीमारियां व्हे रही है। राज्यपाल जलवायु मांय बदलाव रा मौजूदा दौर मांय बत्ता ऊं बत्ता पौधा रोप र कुदरती तरीका ऊं खेती करण माथे ज़ोर दीनो। वे विद्यार्थियां सागे ई बातचीत कीनी। राज्यपाल खेती-बाड़ी अर पशुपालन ऊं जुड़्या उत्पादां री प्रदर्शनी ई देखी। जळसा मांय किसान आयोग रा अध्यक्ष सी.आर चौधरी विद्यार्थियां ऊं नौकरी मांगण वाळा री बजाय नौकरी देवण वाळा बणबा री अपील कीनी। वे कह्यो के देश रा किसान हर हाथ ने हुनर अर हर खेत ने पाणी मिलबा री सूरत मांय ई विकसित व्हेला। ईं मौके विश्वविद्यालय रा कुलपति डॉ. बलराज सिंह बतायो के विश्वविद्यालय रो खास मकसद बायोफोर्टिफाइड किस्मां विकसित करणो है।