राजस्थान हाईकोर्ट राज्य सरकार ऊं पंचायत अर निकाय चुनाव रो कार्यक्रम पेश करण रा हुकम दीना है। मुख्य न्यायाधीश संजीव प्रकाश शर्मा री खंडपीठ गुरूवार ने सुणवाई रे दौरान राज्य सरकार अर प्रदेश रा निर्वाचन आयोग ने चुणाव करावण री तारीख बतावण रा हुकम दीना। अदालत आरक्षण लॉटरी रो ब्यौरो अर ओबीसी आयोग री रपट सूंपण री तारीख बतावण बाबत् ई कह्यो। ध्यानजोग है के हाईकोर्ट पैली 31 जुलाई तांई चुनाव करावण रा हुकम दीना हा, पण ओबीसी आयोग री रपट मांय मोड़ा रो हवालो देता थकां सरकार री ओर ऊं चुनाव करावण रो काम सरू नी करी ज्यो। वकील प्रेमचंद देवंदा खबरनवीसां ने बतायो के मामला री आगली सुणवाई 20 जुलाई ने व्हेला। दूजी कानी पंचायतीराज राज्यमंत्री ओटाराम देवासी जोधपुर मांय खबरनवीसां सागे बातचीत करता थकां कह्यो के सरकार पंचायत चुनाव टेमसर करावणो तैय कीनो है। ईं बीचे राज्य निर्वाचन आयोग रा मुख्य निर्वाचन अधिकारी राजेश वर्मा चुनाव री सरूआती तैयारियां सारू जरूरी दिशा-निर्देश जारी कीना है। वे ज़िला निर्वाचन अधिकारियां ऊं वोटर लिस्टां बणावण, मतदान केंद्रां रो चयन, रिटर्निंग अहलकारां री नियुक्ति अर दूजी व्यवस्थावां करण सारू कह्यो है।