हर घर तिरंगा अभियान रा तहत राज्य मांय आज ई न्यारा-न्यारा कार्यक्रम राख्यी ज्या। जयपुर मांय भारतीय जनता पार्टी री ओर ऊं तिरंगा रैली निकाळी ज्यी। इण ऊं पैली रामलीला मैदान मांय जनसभा राख्यी ज्यी जिण मांय मुख्यमंत्री भजन लाल शर्मा कह्यो के प्रधानमंत्री नरेन्द्र मोदी हर घर तिरंगा अभियान रे जरिये नौजवानां मांय जाग जगावण रो काम कीनो है। वे कह्यो के ईं सदी मांय भारत दुनिया रो सिरमौर बणेला। सभा मांय भाजपा रा प्रदेश अध्यक्ष मदन राठौड, जयपुर री सांसद मंजू शर्मा, विधायक अर भाजपा रा कार्यकर्ता ई मौजूद हा। जयपुर मांय इन्दिरा गांधी राष्ट्रीय मुक्त विश्वविद्यालय इग्नू री ओर ऊं तिरंगा पैदल रैली निकाळी ज्यी। जोधपुर मांय उपमुख्यमंत्री दिया कुमारी तिरंगा यात्रा ने हरी झण्डी बता र रवाना कीनी। ईं मौके दिया कुमारी कह्यो के प्रधानमंत्री नरेन्द्र मोदी हर घर तिरंगा अभियान रा तहत हर एक जणा ने देश प्रेम री भावना ऊं जोड्यो है। वे हर घर माथे तिरंगो झंडो फहरावण री अपील कीनी।उपमुख्यमंत्री कार्यक्रम मांय मौजूद जनता रा नुमाइंदां, अहलकारां, कर्मचारियां अर जनता ने तिरंगा प्रतिज्ञा दिरायी। वे नशा मुक्त भारत अभियान रा तैत चलाया जा रह्या हस्ताक्षर अभियान मांय हस्ताक्षर कर र नशा मुक्ति रो संदेश ई दीनो। प्रदेश रा न्यारा-न्यारा जिलां मांय ई हर घर तिरंगा अभियान रा तैत कार्यक्रम राख्यी ज्या। अलवर मांय निकाळी ज्यी तिरंगा रैली ने केन्द्रीय मंत्री भूपेन्द्र यादव सम्बोधित कीनी। बांसवाड़ा मांय मोहन कॉलोनी ऊं गांधी जी मूरत तांई तिरंगा मैराथन दौड़ राख्यी ज्यी। डीग मांय मोटरसाईकिल रैली निकाळी ज्यी। जैसलमेर रा डाबला मांय सीमा सुरक्षा बल-बीएसएफ री ओर ऊं तिरंगा रैली निकाळी ज्यी अर जनता ने तिरंगा झंडा दिया ज्या। कोटा जिला रा दीगोद मांय तिरंगा ट्रेक्टर रैली निकाळी ज्यी। पाली मांय जय जवान जय तिरंगा जय किसान नारा सागे ट्रेक्टर रैली निकाळी ज्यी। श्रीगंगानगर मांय तिरंगा शपथ दिरायी ज्यी। डूंगरपुर मांय ई वाहन रैली निकाळी ज्यी। चित्तौड़गढ़ मांय जिला कलेक्टर आलोक रंजन अर पुलिस अधीक्षक सुधीर जोशी तिरंगा रैली री अगुवाई कीनी। झुन्झुनू मांय जिला प्रशासन अर कृषि विभाग री ओर ऊं तिरंगा ट्रेक्टर रैली निकाळी ज्यी, जिण मांय 200 ऊं बत्ता किसान ट्रेक्टरां सागे सिरकत कीनी। चूरू मांय धर्म स्तूप माथे 75 मीटर ऊंचो तिरंगो झंडो फहरायी ज्यो। गंगापुरसिटी अर सवाईमाधोपुर मांय ई रैली निकाळी ज्यी। हर घर तिरंगा अभियान रा तहत अजमेर मांय सूफी संत ख्वाजा मोइनुद्दीन हसन चिश्ती री दरगाह कने काल तिरंगा झंडा बांटण रो कार्यक्रम राख्यो जावेला।