हर घर तिरंगा अभियान रा तैत राज्य मांय मंगलवार ने ई न्यारा-न्यारा कार्यक्रम राख्यी ज्या। जयपुर मांय “नगर निगम ग्रेटर री ओर ऊं ऐतिहासिक अल्बर्ट हॉल ऊं निकाळी ज्यी तिरंगा मैराथन ने मुख्यमंत्री भजनलाल शर्मा हरी झंडी बता र रवाना कीनी। ईं मौके वे कह्यो के ’हर घर तिरंगा अभियान देश भक्ति रो जज़्बो जगावे है अर म्हांने इण मांय बढ़-चढ़ र सिरकत करणी चाहिजे। जोधपुर मांय उपमुख्यमंत्री दिया कुमारी कलेक्ट्रेट परिसर ऊं तिरंगा यात्रा ने हरी झंडी बता र रवाना कीनी। अजमेर ज़िला री नसीराबाद फौजी छावनी मांय फौज रा जवान तिरंगा रैली निकाळ र जनता ऊं “तिरंगा महोत्सव“ मांय सिरकत करण री अपील कीनी। बारां मांय तिरंगा दौड़ राख्यी ज्यी, जिण मांय विधायक राधेश्याम बैरवा अर जिला कलेक्टर रोहिताश्व सिंह समेत मोटी तादाद मांय जनता सिरकत कीनी। दौसा मांय शहीद स्मारक ऊं गांधी तिराहा तांई कारां अर मोटर साइकिलां री रैली निकाळी ज्यी, जिण मांय जनता रा नुमाइंदा, ज़िला कलेक्टर, एस.पी., सरकारी कर्मचारी अर मोटी तादाद मांय जनता सिरकत कीनी। हनुमानगढ़ मांय तिरंगा वाहन रैली निकाळी ज्यी, जिण मांय ट्रैक्टर ट्रॉली समेत अढ़ाअर् सौ ऊं बत्ता वाहन सिरकत कीनी। सांचौर मांय जिला कलेक्ट्री परिसर ऊं निकाळी ज्यी तिरंगा रन ने ज़िला कलेक्टर शक्ति सिंह राठौड़ हरी झंडी बता र रवाना कीनी। शाहपुरा मांय हाफ मैराथन राख्यी ज्यी, जिण मांय जिला स्तर रा अहलकार, कर्मचारी, विद्यार्थी अर जनता सिरकत कीनी। गंगापुरसिटी मांय जिला कलक्टर डॉ. गौरव सैनी तिरंगा दौड़ ने कलक्ट्रेट परिसर ऊं रवाना कीनी, जो उदई मोड़ कने फल मंडी पूग र पूरी व्ही। जैसलमेर ज़िला रा फलसूंड मांय तिरंगा यात्रा निकाळी ज्यी। भरतपुर मांय कलेक्ट्रेट परिसर ऊं लोहागढ़ स्टेडियम स्थित शहीद स्मारक तांई तिरंगा रैली निकाळी ज्यी। पाली मांय जय जवान जय तिरंगा जय किसान नारा सागे टैक्टर रैली निकाळी ज्यी, जिण मांय नगर परिषद सभापति रेखा भाटी, जिला कलेक्टर एल.एन.मंत्री, एस.पी. चूनाराम जाट अर मोटी तादाद मांय टैक्टरां माथे किसान अर मोटर साइकिलां माथे जवान अर जनता सिरकत कीनी। श्रीगंगानगर मांय सूचना अर जनसंपर्क कार्यालय मांय सम्मान तिरंगा शपथ दिरायी ज्यी। ईं दौरान अहलकार अर कर्मचारी शपथ ले र ध्वज संहिता री पालना करण रो संकल्प लीनो अर तिरंगा कैनवास माथे दस्तखत करी ज्या। डीग जिला मांय मोटर साइकिल रैली निकाळी ज्यी, जिण मांय जिला कलेक्टर अर एस.पी. खुद मोटर साइकिल माथे सवार व्हे र तिरंगो झंडो लहरायो। हर घर तिरंगा अभियान रा तैत जिला रा न्यारा-न्यारा उपखंडां मांय ई मोटर साइकिल रैली निकाळी ज्यी।
