राजस्थान रा न्यारा-न्यारा वन्य जीव अभ्यारण्यां मांय मंगलवार ने सैलानियां री चहल-पहल ओजू सरू व्हे ग्यी। पाली जिला री सादड़ी-देसूरी वन्य जीव रेंज मांय सादड़ी क्षेत्र रा वन अधिकारी रामचंद्र सिंह राठौड़ अर सादड़ी पुलिस रा सीआई चंपाराम हरी झंडी बता र सफारी ने रवाना कीनी। स्कूली विद्यार्थियां ने मुफ्त सैर करायी ज्यी। सलूंबर जिला री जयसमंद सेंक्चुरी मांय संवारे 6 ऊं 9 बज्यां तांई अर सिंज्यां 4 ऊं 6 बज्यां तांई सैर करी जा सकेला। ईं जंगल मांय तेंदुआ, जंगली सूअर, भालू, रोजड़ा, मोर अर बंदर समेत भांत-भांत रा जिनावर देख्या जा सकेला। ईं बीचे जंगली जिनावरां ने बचावण अर वां री हिफाजत रा बारा मांय जाग जगावण रा मकसद ऊं काल ऊं 8 अक्टूबर तांई वन्यजीव सप्ताह मनायो जावेला। ईं दौरान काल चित्तौडगढ रा वन मण्डल परिसर मांय वन्यजीव सरक्षण अर पर्यावरण जागरूकता साइकिल रैली अर वन्यजीव सप्ताह रो उद्धघाटन कर्यो जावेला।