राजस्थान रा न्यारा-न्यारा हलकां मांय पड़ रही गर्मी बीचे शुक्रवार ने केई ठौड़ां बिरखा व्ही। पाली ज़िला रा फालना, पीपला, सेवाड़ी अर बीसलपुर गांवां मांय बिरखा व्ही। भीलवाड़ा मांय दोपहरां री बगत हल्की बरसात व्ही, जिण ऊं गर्मी ऊं आराम मिल्यो। बाड़मेर ज़िला रा केई गांवां मांय ई शुक्रवार ने तीजा पहर व्ही बिरखा ऊं साखां ने फायदो मिलेला। चौहटन मांय ज़ोरदार मेह बरस्यो। बालोतरा मांय सिंज्या री पोर बादळा मण्ड ग्या। डूंगरपुर मांय ई सिंज्यां री पोर व्ही बिरखा ऊं सड़कां माथे पाणी बहवण लाग्यो। सिरोही ज़िला रा आबूरोड़ अर माउन्टआबू समेत न्यारा-न्यारा हलकां मांय व्ही बिरखा ऊं मौसम सुहावणो व्हे ग्यो। भरतपुर मांय दोपहरां पाछे व्ही हल्की बरसात ऊं सीळो बायरो बाज्यो अर गर्मी अर उमस ऊं साता मिली। श्रीगंगानगर मांय दोपहरां री बगत जिला मुख्यालय, साधुवाली, रायसिंहनगर अर अनूपगढ़ हलकां मांय तेज अंधड़ सागे 15-20 मिनट तांई बिरखा व्ही। अंधड़ रे कारण खेतां मांय ऊबी साखां ने नुकसाण व्हेवण री शंका है। उदयपुर मांय ई सिंज्यां री पोर बिरखा व्ही। सांचौर मांय ज़ोरदार मेह बरस्यो। ईं बीचे टोंक ज़िला मांय बिरखा करीब-करीब बंद व्हे जावण पाछे बीसलपुर बंधा मांय पाणी री आमद कम व्हे ग्यी है अर बंधा रा पांच दरूजा बंद कर दिया ज्या है। बंधा रो केवल एक दरूजो खोल र केवल 1 हजार 305 क्यूसेक पाणी निकाळ्यो जा रह्यो है। ईं बीचे फलौदी मांय पारो 41 डिग्री सेल्सियस ने पार कर ग्यो। मौसम विभाग शुक्रवार ने जयपुर, कोटा, भरतपुर, अजमेर अर उदयपुर संभागां मांय कठे-कठे बिरखा रा आसार जताया है। जोधपुर संभाग मांय कठे-कठे बिरखा री संभावना है।