राजस्थान मांय जठे एक कानी केई जिला मॉनसून री बिरखा सूं तर हो रिया है, बठीने दूजी कानी केई जिला बरसात री उड़ीक कर रिया है। राजधानी जयपुर मांय सुंवारे सूं चाल री बादळां री लुका-छिपी रे पाछे दोपहरां मांय केई जगावां तेज अर कठी-कठी हळकी बिरखा व्ही। सवाईमाधोपुर मांय सुंवारे झमाझम बरसात व्ही। बठीने हनुमानगढ़ मांय भी जिला मुख्यालय समेत भादरा, संगरिया अर पल्लू खेतर मांय तेज बिरखा दरज करीजी। पाली अर आसे-पासे रा खेतर मांय चैखी बिरखा होणे सूं काश्तकार खरीफ फसल री बुवाई री तियारियां सरू कर दी है। उदयपुर मांय सिंज्या व्ही मूसलाधार बिरखा सूं शहर रा केई इलाकां मांय पाणी भर गयो। बठीने बालोतरा अर सिरोही जिला मांय सुंवारे सूं उमस अर गर्मी सूं जनजीवन प्रभावित है। मौसम केन्द्र जयपुर रे मुजब राज्य रा पूर्वी भागां मांय आवता पांच-छह दिनां मॉनसून सक्रिय रहणे अर घणखर ठोड़ा माथे हळकी सूं मध्यम बिरखा अर कठी-कठी भारी बिरखा री आस है। दक्षिण-पूर्वी अर पूर्वी राजस्थान मांय काले सूं भारी बरसात री गतिविधियां मांय और बधोतरी व्हे सके है। आज लगेटगे सगळा संभागां रा जिलां मांय तेज बिरखा रो अलर्ट है।