प्रदेश रा केई जिलां मांय तेज़ बारिश व्हे रही है। लारला 24 घंटा मांय बूंदी, भीलवाड़ा, करौली, जोधपुर, बाड़मेर, टोंक अर जयपुर ज़िलां मांय केई ठौड़ां ज़ोरदार मेह बरस्यो। बूंदी ज़िला रा नैनवा मांय सब ऊं बत्तो 141 मिलीमीटर पाणी बरस्यो। दूजी कानी जोधपुर संभाग मांय दो दिन मांय व्ही बिरखा पाछे आज हालात मांय सुधार व्ह्यो। जोधपुर-जैसलमेर रेलवे लेण माथे आज गाडियां री आवण-जावण ओजू सरू व्हे ग्यी। भारी बारिश ऊं इंर् लेण री पटरियां हेटे ऊं मिट्टी बह जावण रे कारण रेलां री आवण-जावण माथे असर पड़्यो हो। सवाईमाधोपुर ज़िला मांय लगातार व्हे रही बरसात रे कारण 12 ऊं बत्ता छोटा-मोटा बंधा माथे चादर चाल रही है। सवाईमाधोपुर रा जिला कलेक्टर डॉ. खुशाल यादव बौंली हलका रा मोरेल बंधा माथे चादर चालण पाछे आज हालात रो जायज़ो लीनो। भीलवाड़ा ज़िला अर शहर मांय आज ई ज़ोरदार मेह बरस्यो। शाहपुरा ज़िला मांय ई लगातार व्हे रही बिरखा रे कारण फूलियाकलां मांय खारी नदी री पुलिया माथे पाणी बेह रह्यो है। ईं कारण शाहपुरा-केकड़ी गेलो बंद व्हे ग्यो है। केकड़ी ज़िला मांय व्हे रही भारी बारिश रे कारण खारी नदी मांय पाणी उफण रह्यो है। सलूंबर ज़िला मांय लगातार व्हे रही बिरखा रे कारण मानपुरा नदी मांय उफण रह्या पाणी ऊं खारवा चांदा रो जिला मुख्यालय ऊं संपर्क टूट ग्यो है। सांचोर मांय आज करीब दो घंटा तांई ज़ोरदार मेह बरस्यो। सिरोही जिला मांय माउंट आबू समेत न्यारी-न्यारी ठौड़ां रुक-रुक र व्हे रही बिरखा ऊं नदी-नाळां मांय लगातार पाणी आ रह्यो है। माउंट आबू मांय बह रह्या न्यारा-न्यारा झरनां ने निरखण सारु मोकळा सैलाणी पूग रह्या है। डूंगरपुर मांय आखा दिन रूक-रूक र पाणी बरस्यो। पाली मांय व्हे रही बिरखा ने ध्यान राखता थकां ज़िला कलेक्टर जनता ऊं सावधानी राखण री अपील कीनी है। भीलवाड़ा रा ज़िला कलेक्टर नमित मेहता एस.पी. राजन दुष्यंत सागे गोवटा अर जेतपुरा बंधां रो दौरो कर र अहलकारां ने जनता री हिफाज़त सारू वां ने बंधा रा पाणी ऊं दूर राखण बाबत् जरूरी व्यवस्था करण रा हुकम दीना। करौली रा ज़िला कलेक्टर नीलाभ सक्सेना हिण्डौन हलका मांय घणी बिरखा रे कारण पाणी रा भराव वाळा जाटव बस्ती अर दूजा हलकां रो दौरो कर र अहलकारां ने ज़रूरी हुकम दीना। टोंक मांय आज सिंज्या छांटो-छिड़को व्ह्यो। ज़िला रा बीसलपुर बंधा मांय पाणी रो लेवल 315 दशमलव 19 आर एल मीटर व्हे ग्यो है। मौसम केंद्र जयपुर रे मुजब राज्य रा ऊगणी हलका मांय आवता 4-5 दिन चौमासा री चोखी बिरखा व्हेवण रा आसार है। ईं दौरान लंकाऊ अर लंकाऊ-ऊगणी हलकां मांय कठे-कठे भारी तो कठे-कठे घणी भारी बिरखा रा आसार है। 10 सितंबर ऊं भारी बारिश मांय कमी आवण री संभावना है। जोधपुर अर बीकानेर संभाग रा कुछ हलकां मांय आवता तीन दिन कठे-कठे भारी बारिश व्हेवण रा आसार है। बीकानेर संभाग मांय 8 अर जोधपुर संभाग मांय 9 सितंबर ऊं बिरखा मांय कमी व्हेवण रा आसार है। ईं बीचे चौमासा री रूत मांय आंख्यां रा संक्रमण कंजक्टिवाइटिस री शंका ने ध्यान राखता थकां चिकित्सा विभाग सावचेत रहवण री राय दीनी है।