राजस्थान रा ऊगणी हलकां मांय भारी बारिश रे कारण जिदंगी माथे घणो असर पड़्यो है। लारला 24 घंटां मांय राजाखोड़ा, धौलपुर, वाईमाधोपुर, अकलेरा अर मनिया मांय घणी जोरदार बिरखा व्ही। ईं रे अलावा 30 कस्बां अर शहरां मांय जोरदार मेह बरस्यो। धौलपुर जिला मांय लगातार बारिश रे कारण सैपउ उपखण्ड रा गोगली गांव मांय एक मकान ढस जावण ऊं दब र दो बच्चां री मौत व्हे ग्यी। हादसा मांय चार जणा ज़ख्मी व्हे ग्या, ज्यां ने धौलपुर रा अस्पताल मांय भर्ती करायी ज्या है। ज़िला मांय चम्बल नदी मांय पाणी रो लेवल लगातार बध रह्यो है। पार्वती नदी मांय ई लगातार आ रह्या पाणी रे कारण ईं माथे बण्या बंधा रा 16 दरूजा खोल र बत्तो पाणी निकाळ्यो जा रह्यो है। जिला मांय धौलपुर-बाड़ी गेलो बंद व्हे ग्यो है। करौली जिला मांय पांचना बंधा ऊं ई बत्तो पाणी छोड़्यो जा रह्यो है। भरतपुर मांय लगातार व्हे रही बिरखा ऊं केई गेला बंद व्हे ग्या। म्हाणा खबरनवीस बतायो के जिला रा बंध बारेठा रा पांच दरूजा खोल र बत्तो निकाळ्यो जा रह्यो है। सवाईमाधोपुर जिला मांय मिश्र दर्रा कने चट्टानां पड़ जावण अर सड़कां टूट जावण रे कारण त्रिनैत्र गणेश मिंदर जावण वाळो गेलो बंद व्हे ग्यो है। झालावाड़ ज़िला मांय गुरूवार ने संवारे ऊं ई रुक-रुक र बरसात व्हे रही है। पूरा जिला अर पड़ौसी राज्य मध्यप्रदेश मांय व्हे रही बिरखा रे कारण ज़िला री न्यारी-न्यारी नदियां मांय पाणी बह रह्यो है, ज्यीं कारण भीमसागर, छापी ,चवली अर दूजा बंधा अर तळाबा माथे पाणी री चादर चाल रही है। तेज बरसात, पाणी भरण अर मौसम विभाग कानी ऊं जोरदार बिरखा सारू चेतायां पाछे केई जिलां मांय स्कूली विद्यार्थियां सारू छुट्टी रो ऐलाण कर दियो ज्यो है। मौसम विभाग रे मुजब मध्यप्रदेश रा ऊपर बण्यो कम दबाव रो हलको गुरूवार ने दक्षिण-पश्चिमी उत्तर प्रदेश रा ऊपर पूग ग्यो है, जिण रे आवता 24 घंटा मांय उत्तर दिशा मांय आगे बधबा रा आसार है। इण रा असर ऊं आवता चौबीस घंटां मांय भरतपुर, जयपुर अर कोटा संभाग मांय कठे-कठे भारी अर घणी भारी बिरखा रा आसार है। मौसम विभाग रा जयपुर केन्द्र रा निदेशक राधेश्याम शर्मा बतायो के अजमेर अर उदयपुर संभाग मांय ई केई ठौड़ां बिरखा रा आसार है।