प्रदेश मांय राज्यसभा उप चुनाव सारू तीन उम्मीदवार पर्चा दाखिल कीना है। आज नामपाना दाखिल करण री आखिरी तारीख ने भारतीय जनता पार्टी रा उम्मीदवार केंद्र सरकार मांय राज्य मंत्री रवनीत सिंह नाम पाना रा चार सैट दाखिल कीना। वे विधानसभा भवन मांय मुख्यमंत्री भजन लाल शर्मा, उपमुख्ममंत्री दिया कुमारी अर प्रेम चंद बैरवा, संसदीय कार्यमंत्री जोगाराम पटेल अर केई आला नेतावां री मौजूदगी मांय निर्वाचन अधिकारी सामी पर्चो दाखिल कीनो। पर्चो दाखिल कर्यां पाछे रवनीत सिंह खबरनवीसां सागे बातचीत करता थकां कह्यो के अब पंजाब सागे राजस्थान ई वां री कर्मभूमि बणबा वाळी है अर वे प्रदेश रा विकास मांय कोई कसर नी छोडे़ला। राज्यसभा उपचुनाव सारू पर्चो दाखिल करण रो आज आखिरी दिन हो। आज ई भारतीय जनता पार्टी री ओर ऊं डमी उम्मीदवार रा तौर ऊं सुनील कोठारी ई पर्चो दाखिल कीनो। ध्यानजोग है के प्रदेश ऊं राज्य सभा री एक रीती सीट सारू व्हे रह्या उप चुणाव मांय पर्चो दाखिल करण रा आखिरी दिन आज तांई तीन उम्मीदवार नाम पाना दाखिल कीना है। 17 अगस्त ने निर्दलीय उम्मीदवार बबीता वाधवानी ई राज्य सभा उप चुणाव सारू पर्चो दाखिल कीनो हो। कांग्रेस या दूजी किण ई सियासी पार्टी री ओर ऊं नामपानो दाखिल नी करी ज्यो है। दाखिल करी ज्या नामपानां री काल जांच करी जावेला। उम्मीदवार 27 अगस्त तांई नाम पाछा ले सकेला। ज़रूरत पड़्यां 03 सितम्बर ने वोट पड़्ेला अर वां ई दिन वोटां री गिणती करी जावेला।