राजस्थान मांय मॉनसूनी बिरखा रो दौर बरोबर चाल रह्यो है। खासकर ने अगूणी राजस्थान मांय न्यारी-न्यारी ठौड़ां दीतवार ने पूरा व्ह्या 24 घंटां मांय भारी बिरखा दर्ज करी ज्यी है। मौसम केन्द्र जयपुर मुजब दीतवार ने पूरा व्ह्या 24 घंटां मांय सब ऊं बत्ती 38 सेंटीमीटर बिरखा करौली मांय दर्ज करी ज्यी। टोंक मांय 14, बारां रा शाहबाद मांय 12, दौसा रा सिकराय मांय 11 सेंटीमीटर बिरखा दर्ज व्ही है। करौली ज़िला मांय व्हे री बिरखा ऊं निचला हलकां मांय पाणी भरीज ग्यो है। भारी बिरखा ने देखता ज़िला रा सगळा सरकारी अर गैर सरकारी स्कूलां मांय सोमवार ने छुट्टी ऐलाण करी है। वठे ई बचाव रा कामा सारू एस.डी.़आर.एफ. री टीम तैनात करी ज्यी है सवाईमाधोपुर मांय काले रात ऊं सरू व्ह्यो बिरखा रा दौर आज ई रूक-रूक ने चालतो रह्यो। शहर रा केई हलकां मांय सड़का माथे पाणी भरीज ग्यो है। बिरखा रे कारण रणथम्भौर दुर्ग मार्ग रूकीज ग्यो है वठे ई भरतपुर संभाग मांय तेज बिरखा रो दौर चाल रह्यो है। अठिने राजधानी जैपर मांय आज संवारां ऊं ई बिरखा रा दौर बण्योड़ो है। तेज़ बिरखा रे कारण सड़कां अर निचला हलकां मांय पाणी भरीजण ऊं आम जिन्दगी माथे असर व्ह्यो है। चूरू ज़िला मांय दीतवार ने बित्या दो दिनां ऊं व्ही चोखी बिरखा ऊं काश्तकारां मांय खुशी रो माहौल है। काश्तकारां रो माननो है के आ बिरखा फसलां सारू घणी फायदामंद है। सिरोही जिला मांय माउंट आबू समेत केई ठौड़ां रूक-रूक ने बिरखा रो दौर चालतो रह्यो। उत्तराध अगूणी राजस्थान अर आरे-सारे रा हलकां रे ऊपर आज ईं एक परिसंचरण तंत्र बण्योड़ो है।