मुख्यमंत्री भजन लाल शर्मा आज दौसा, करौली अर भरतपुर जिला रा घणी बिरखा वाळां हलकां रो दौरो कीनो। वे दौसा जिला रा राहुवास-निर्झरना-लालसोट, करौली जिला रा सपोटरा अर हिंडौन समेत केई हलकां रो हवाई दौरो कर र हालात रो जायज़ो लीनो। ईं पाछे मुख्यमंत्री करौली मांय ज़िला रा आला अहलकारां सागे मीटिंग कर र राहत रा काम तेज करण रा हुकम दीना। मुख्यमंत्री भरतपुर जिला रा घणी बिरखा वाळा हलकां रो ई हवाई दौरो कीनो। वे भरतपुर शहर, बयाना, रूपवास अर दूजा हलकां मांय पाणी भरण रे कारण उपज्या हालात रो जायजो लीनो। मुख्यमंत्री पांचना बंधा ऊं गंभीर नदी मांय आ रह्या पाणी सागे ई पाणी भरण रे कारण उपज्या हालात अर बचाव रा काम री अहलकारां ऊं विगतवार जाणकारी लीनी। वे दो दिन पैली बयाना री बाणगंगा नदी मांय डूब जावण ऊं मर्या नौजवानां रा रहवास माथे वां रा पिरवार वाळां सागे मुलाकात कर र वां ने ढाढ़स बंधायो अर मरण वाळां रा पिरवार वाळां ने हर संभव मदद रो भरोसो दिरायो। इण ऊं पैली मुख्यमंत्री जयपुर मांय व्ही तेज बिरखा रे कारण उपज्या हालात रा बारा मांय आला अहलकारां सगो मीटिंग कीनी। वे भारी बारिश रे कारण जयपुर शहर मांय उपजी साफ-सफाई, ड्रेनेज, सीवरेज, टूटी सड़कां अर दूजी समस्यावां आगी करण सारू संबंधित महकमा रा आला अहलकारां ने जयपुर शहर रो दौरो कर र मुख्यमंत्री रा दफ्तर ने दौरा री रपट पेश करण रा हुकम दीना। मुख्यमंत्री बत्ती बिरखा रा असर वाळा हलकां मांय जनता ने तुरत साता पूगावण रा हुकम दीना। मुख्यमंत्री शहर मांय ट्रांसफार्मरां रा खुला तारां माथे गहरी नाराज़गी जताता थकां अहलकारां ने आज ई मौका मुआयनो कर र सगळा ट्रांसफार्मर रा रख-रखाव रा हुकम दीना। आपदा राहत मंत्री किरोड़ी लाल मीणा ई आज घणी बिरखा वाळा भरतपुर ज़िला रा बयाना पूग र वठे घणी बिरखा रे कारण दो दिन पैली 7 जणां री मौत माथे दुःख जतायो अर दुःखी पिरवार वाळां ने आपदा प्रबंधन विभाग री ओर ऊं दिया ज्या 4-4 लाख रुप्या रा चैक सूंप्या। डॉ मीणा कने कृषि विभाग सागे आपदा-प्रबंधन विभाग रो ई जिम्मो है। वे करौली अर हिंडौन सिटी मांय घणी बत्ती बिरखा रा असर वाळा हलकां रो दौरो कर र हालात रो जायजो लीनो। डॉ. मीणा दौसा जिला रा महुआ मांय ई तेज बारिश ऊं परेशान जनता री समस्यावां सुणी। ईं बीचे भाजपा रा नुवा प्रदेश अध्यक्ष मदन राठौड़ आज जयपुर मांय खबरनवीसां सागे बातचीत करता थकां कह्यो के किरोडी़ लाल मीणा राज्य सरकार रा मंत्री है अर वे वां रो काम कर रह्या है। ध्यानजोग है के लोकसभा चुनाव मांय दौसा समेत कुछ सीटां माथे भारतीय जनता पार्टी रा उम्मीदवारां री हार पाछे मीणा मंत्री पद ऊं इस्तीफो दे दीनो हो, हालांकि वां रो इस्तीफो हाल ई मंजूर नी करी ज्यो है।