मिंदरां अर घरां मांय घट स्थापना सागे नौरता गुरूवार ने धार्मिक उमाव ऊं सरु व्ह्या। ईं रा तैत नौ दिन तांई मां दुर्गा रा नौ रूपां री पूजा-अर्चना करी जावेला। आज शैलपुत्री स्वरूप री अराधना करी जा रही है। ईं मौके मिंदरां ने खासतरीका ऊं सजायी ज्या है। जयपुर रा आमेर, दुर्गापुरा, झालाना डूंगरी अर राजा पार्क समेत दुर्गा माता रा न्यारा-न्यारा मिंदरां मांय जातरुआं सारु खास व्यवस्था करी ज्यी है। आमेर रा शिला माता मिंदर मांय गुरूवार ने मेळो सरु व्ह्यो। 13 अक्टूबर तांई भरण वाळा मेळा ने ध्यान राखता थकां प्रशासन आवण-जावण रा खास इंतजामात कीना है। जैसलमेर ज़िला मांय पाकिस्तान ऊं लाग्योड़ी सरहद कने तनोट माता रा मिंदर मांय ई सोहवणी सजावट करी ज्यी है। न्यारी-न्यारी ठौड़ां ऊं जातरु माता रा दर्शन सारु पूग रह्या है। सीकर ज़िला रा जीण माता मिंदर मांय ई आज घट स्थापना सागे जीण माता रो खास श्रंगार करी ज्यो है। वठे आज जीण माता रो मेळो ई सरु व्ह्यो। सवाईमाधोपुर ज़िला रा चौथ का बरवाड़ा मिंदर मांय ई खास धार्मिक अनुष्ठान कर्या जा रह्या है। हनुमानगढ़ टाउन रा भद्रकाली मिंदर अर पल्लू रा ब्रह्माणी मिंदर मांय ई मेळा भर रह्या है। पाली रा जोगमाया मिंदर मांय फूलां ऊं सोहवणी सजावट करी ज्यी है। डूंगरपुर अर बालोतरा रा न्यारा-न्यारा दुर्गा मिंदरां मांय ई माता रा जयकारा गूंज रह्या है। करौली ज़िला रा कैलादेवी मांय ई आज मेळो सरु व्ह्यो जिण मांय राजस्थान समेत आरे-सारे रा राज्यां ऊं जातरु पूग रह्या है। प्रदेश मांय न्यारी-न्यारी ठौड़ां आज रामलीला ई सरु व्ही। कोटा मांय नामी दशहरा मेळा रो उद्घाटन लोकसभा अध्यक्ष ओम बिरला करेला। संवारे री पोर आशापुरा माता री विधि-विधान सागे पूजा-अर्चना करी ज्यी। अजमेर मांय जवाहर रंगमंच माथे ई रामलीला रो दरसाव कर्यो जावेला। चूरू मांय कलश यात्रा निकाळी ज्यी अर जूना दुर्गा शक्ति मिन्दर मांय जातरू मां दुर्गा री खास आरती कीनी। सिरोही जिला रा देवी मिंदरां मांय खास धार्मिक आयोजन राख्या जा रह्या है। मोड़ी सिंज्यां न्यारी-न्यारी ठौड़ां गरबा महोत्सव ई राख्या जावेला। झालावाड़ जिला मांय राता देवी, दुधाखेडी अर मिश्रोली रा माता जी रा मिंदरां मांय मोटी तादाद मांय जातरू पूग रह्या है। आज आं तीन ई ठौड़ां नौरता रा मेळा ई सरू व्ह्या। जिला मांय न्यारी-न्यारी ठौड़ां गरबा रा कार्यक्रम ई राख्या जा रह्या है। म्हाणा चित्तौडगढ़ खबरनवीस बतायो के नौरता रा पैला ई दिन मिंदरां मांय मोटी तादाद मांय जातरू पूग्या। किला माथे रा कालिका मिंदर रे बाहर आधी रात ऊं ई जातरूआं री लेणा लागण लाग्यी।