राज्य मांय स्वच्छता पखवाडा़ रा तैत आज ई न्यारा-न्यारा कार्यक्रम राख्यी ज्या। भरतपुर मांय नगर निगम री ओर ऊं सफाई मित्रां सारू लगायी ज्या स्वास्थ्य शिविर मांय सफाई कर्मचारियां री ब्लड प्रेशर अर डायबिटीज समेत न्यारी-न्यारी बीमारियां री जांच करी ज्यी। ईं दौरान कर्मचारियां ने प्रधानमंत्री आवास योजना, उज्ज्वला योजना अर आयुष्मान भारत योजना रा बारा मांय ई जाणकारी दीरीजी। नदबई मांय रैली निकाळ र साफ-सफाई राखण री अपील करी ज्यी। ई सागे ई बत्ता ऊं बत्ता पौधा रोप र पर्यावरण ने बचावण री अपील ई करी ज्यी। झालावाड़ मांय स्वच्छता ही सेवा अभियान री थीम स्वभाव स्वच्छता संस्कार स्वच्छता रा तैत नगर परिषद री ओर ऊं एक गैर सरकारी स्कूल मांय रंगोली माण्डण अर चित्रकला री होड़ां राख्यी ज्यी। शाहपुरा ज़िला मांय साफ़-सफ़ाई रा बारा मांय जाग जगावण सारू कनेछन कलां री लडकियां री सरकारी स्कूल मांय टाबरियां मानव श्रृंखला बणा र सफ़ाई राखण रो संदेश दीनो। सवाईमाधोपुर मांय नगर परिषद री ओर ऊं आज नगर परिषद ऊं महावीर पार्क तांई स्वछता रैली निकाळी ज्यी। रैली रे मार्फत मनरेगा रा तैत काम करण वाळा मजूर, खुद सेवक समूहां री महिलावां अर नगर परिषद रा कर्मचारी साफ़ सफ़ाई राखण रो संदेश दीनो। जोधपुर रा भारतीय हथकरघा प्रौद्योगिकी संस्थान मांय पत्र सूचना कार्यालय री ओर ऊं विद्यार्थियां सारु प्रश्नोत्तरी होड़ राख्यी ज्यी।