प्रदेश रा न्यारा-न्यारा हलकां मांय जोरदार मेह बरस रह्यो है। लारला 24 घंटा मांय केई ठौड़ां भारी ऊं घणी भारी बिरखा दर्ज करी ज्यी। बूंदी ज़िला रा हिंडोली मांय सब ऊं बत्ती 220 मिलीमीटर बिरखा दर्ज करी ज्यी। अजमेर ज़िला रा मांगलियावास मांय 200 मिलीमीटर ऊं बत्तो पाणी बरस्यो। बीकानेर, अजमेर, नागौर, पाली, दौसा अर सवाईमाधोपुर ज़िलां मांय ई कठे-कठे जोरदार मेह बरस्यो। भारी बारिश रे कारण जयपुर शहर रा चार दीवारी हलका मांय तीन मंजिल रो एक मकान ढ़स ग्यो, हालांकि ईं कारण जान रा नुकसाण रो कोई समाचार नी है। जयपुर कने जोबनेर मांय लारला दो दिन रे दौरान व्ही जोरदार बिरखा पाछे बाढ़ सरीखा हालात बण ग्या है। वठे चिरनोटिया तळाव कने बण्या मकान मांय तेज बारिश पाछे कटाव ऊं मकान ढस ग्यो। जोबनेर मांय प्रशासन री ओर ऊं राहत रा काम सरू कर दिया ज्या है। पाली ज़िला मांय ई केई ठौड़ां भारी बिरखा दर्ज करी ज्यी। हनुमानगढ़ ज़िला मांय आज ई हल्की ऊं मझला दर्जा री बिरखा रो दौर चालतो रह्यो। बीकानेर मांय भारी बिरखा री चेतावनी पाछे प्रशासन कटाव वाळा गेलां माथे आवण-जावण बंद करण रा हुकम दीना है। नागौर ज़िला मांय व्ही भारी बिरखा बीचे खींवसर मांय बाढ़ रा हालात पैदा व्हे ग्या है। वठे एक मकान पड़ ग्यो। पाली मांय ई केई ठौड़ां ज़ोरदार बिरखा रा समाचार है। सवाईमाधोपुर ज़िला मांय लारला 24 घंटा मांय 118 मिली मीटर बिरखा मापी ज्यी। ब्यावर मांय ज़ोरदार बिरखा ने ध्यान राखता थकां 12वीं कक्षा तांई रा विद्यार्थियां सारू काल तांई छुट्टी रो ऐलाण कर दियो ज्यो है। जैसलमेर ज़िला रा केई हलकां मांय ई तेज़ बारिश व्ही है। ज़िला रा भणियाणा, राजमथाई अर नाचना हलका मांय व्ही ज़ोरदार बिरखा ऊं जिन्दगी माथे असर पड़्यो है। बाड़मेर अर जालौर ज़िलां आज आखा दिन रूक-रूक मेह बरस्यो। चित्तौड़गढ़ ज़िला रा रावतभाटा मांय मंडेसरा हलका रा पाड़ाझर झरना माथे काल गोठ मनावण गया लोग पाणी रा तेज़ बहाव बीचे फंस ग्या, ज्यां ने आज बचाव दल निकाळ्या। ई बीचे टोंक री ज़िला कलेक्टर मांशी बांध रो दौरो कर र बांध ऊं पाणी री निकासी अर हिफ़ाजत ऊं जुड़्या इन्तजामात रो जायजो लीनो। वे जनता ऊं बांध रा जल भराव अर नदी नाळां मांय पाणी रा तेज़ बहाव ऊं दूर रहवण री अपील कीनी। ज़िला कलेक्टर कह्यो के किसानां ने फ़सल खराबा रो मुआवज़ो दिरावण सारू गिरदावरी करावण रा हुकम दिया ज्या है। बीसलपुर बांध मांय पाणी रो लेवल 312 दशमलव 95 आरएल मीटर व्हे ग्यो है। मौसम केंद्र जयपुर रा निदेशक राधेश्याम शर्मा बतायो के आज जैसलमेर अर जोधपुर मांय भारी बारिश रो रेड अलर्ट जारी करी ज्यो है। बाड़मेर, बीकानेर, नागौर अर पाली ज़िलां सारू आज बिरखा रो ऑरेंज अलर्ट जारी करी ज्यो है।