राज्य मांय चौमासा री ईं रूत मांय हाल तांई औसत ऊं 44 फीसदी बत्तो पाणी बरस्यो है। मौसम विभाग कानी ऊं मिली जाणकारी रे मुजब ईं दौरान प्रदेश रा आतूणी जिलां मांय 71 फीसदी अर ऊगणी जिलां मांय 27 फीसदी बत्ती बिरखा व्ही है जद के प्रदेश रा 23 जिलां मांय घणी बत्ती बिरखा व्ही है। 13 जिलां मांय औसत ऊं बत्तो पाणी बरस्यो है। ईं साल एक जून ऊं हाल तांई 8 जिलां मांय सामान्य अर 6 जिलां मांय औसत ऊं कम बरसात व्ही है। जल संसाधन विभाग रे मुजब प्रदेश मांय हाल तांई बरस्या मेह ऊं बंधां मांय भराव बूता रो करीब 61 फीसदी पाणी आ ग्यो है। ईं दौरान कुल 691 छोटा-मोटा बंधा मांय ऊं 192 पूरा भर ग्या है जद के 340 बंधा थोड़ा-घणा भर्या है। ईं बीचे प्रदेश रा केई ज़िलां मांय आज ई चोखो मेह बरस्यो। डूंगरपुर अर भीलवाड़ा जिलां मांय दोपहरां पाछे तेज बिरखा व्ही। जयपुर रा केई हलकां मांय ई आज हल्की बारिश व्ही। दौसा मांय ई लगातार मेह बरस रह्यो है। पाली ज़िला रा केई हलकां मांय दोपहरां री बगत व्ही बिरखा ऊं पाणी भर ग्यो। श्रीगंगानगर अर डूंगरपुर मांय ई केई ठौड़ां बिरखा रा समाचार है। कोटा मांय ई सिंज्यां री पोर जा़ेरदार पाणी बरस्यो। लारला 24 घंटा मांय जयपुर, धौलपुर ज़िला रा राजाखेड़ा अर झालावाड़ ज़िला रा गंगधार मांय ज़ोरदार मेह बरस्यो। जैसलमेर मांय बिरखा रूक्यां पाछे हाल ई केई गांवां मांय पाणी भर्यो है, जिण ने निकाळबा सारू ज़िला प्रशासन कोशिश कर रह्यो है। करौली मांय ई सिंज्यां री पोर मेह बरस्यो। मौसम विभाग रे मुजब राज्य रा ऊगणी हलकां मांय आवता एक सप्ताह तांई चौमासा री बिरखा चालती रेहवण रा आसार है। ईं दौरान भरतपुर, जयपुर, अजमेर, कोटा अर उदयपुर संभाग रा कुछ हलकां मांय तेज बारिश री संभावना है। कोटा, उदयपुर अर जयपुर संभाग रा जिलां मांय आवता 5-6 दिन कठे-कठे भारी बारिश रा आसार है। कोटा अर उदयपुर संभाग रा कुछ हलकां मांय 25 अर 26 अगस्त ने भारी बारिश रा आसार है। जोधपुर अर बीकानेर संभाग रा कुछ हलकां मांय आवता दो-तीन दिन कठे-कठे हल्की ऊं मझला दर्जा री बिरखा रा आसार है।