राजस्थान दिवस साप्ताहिक महोत्सव रे तैत सोमवार ने जयपुर मांय राज्य थर रो निवेश उत्सव राईजिंग राजस्थान इम्पेक्ट 1.0 रो आयोजन करी ज्यो। उत्सव मांय बोलता मुख्यमंत्री भजन लाल शर्मा कह्यो के आज रो निवेश उत्सव एक महताऊ माइलस्टोन इम्पैक्ट 1.0 माथे केन्द्रित है, जो राइजिंग राजस्थान ग्लोबल इन्वेस्टमेंट समिट रे तैत करी ज्या एम.ओ.यू. ने धरती माथे उतारण री आपा री कोशिशां ने दरसावे है। वणा कह्यो के राज्य सरकार आं निवेश प्रस्तावां ने धरा माथे उतारण सारू हर महकमां अर जिला मांय डेडिकेटेड टीम बणायी है, जो इण एम.ओ.यू. री सक्रिय रूप ऊं निगराणी कर री है। श्री शर्मा कह्यो के आ कोशिशां रो ई नतीजो है के राइजिंग राजस्थान रे तैत व्ह्या एम.ओ.यू. मांय ऊं 3 लाख करोड़ रिप्यां री परियोजनावां री ग्राउंड ब्रेकिंग व्हे री है। वणा कह्यो के ओे उत्सव राज्य रा आर्थिक विकास री दिशा मांय एक महताऊ कदम साबित व्हेला। उत्सव रे दौरान मुख्यमंत्री ऐलाण कर्यो के 30 अप्रैल तांई एम.ओ.यू. करण वाळां निवेशकां सारू 15 मई तांई खास पोर्टल री मार्फत जम़ी आवंटन री सुविधा दी जायेला। साथै ही वणा राजस्थान फाउण्डेशन रा 14 नुवां चैप्टर खोलण रो ई ऐलाण कर्यो। मुख्यमंत्री कह्यो के आपां पांच सालां मांय सरकारी हलका मांय 4 लाख अर निजी हलका मांय 6 लाख रोजगार रा मौका ई बणाया जायेला। वणा कह्यो के ई बरस 11 अर 12 दिसम्बर ने दो दिन रो राइजिंग राजस्थान पार्टनशिप कॉन्क्लेव ई व्हेला। कार्यक्रम मांय मुख्यमंत्री ऑनलाइन इन्वेस्टर इंटरफेस रो मोबाइल ऐप ई लॉन्च कर्यो। उत्सव मांय बोलतां उद्योग मंत्री कर्नल राज्यवर्धन सिंह राठौड़ कह्यो के राज्य सरकार प्रदेश मांय निवेश ने बधावो देवण सारू बरोबर फैसला लेय री है जिण ऊं साल 2047 तांई विकसित राजस्थान रा संकल्प ने पूरो कर्यो जा सके। प्रदेश रा न्यारा-न्यारा जिलां ऊं कलेक्टर अर न्यारा-न्यारा महकमां रा अहलकार ई राज्य थर रा निवेश उत्सव मांय वर्चुअल जुड़्यां।