राजस्थान दिवस साप्ताहिक महोत्सव रा तैत गुरूवार ने भरतपुर मांय राज्य स्तर रो अन्त्योदय कल्याण समारोह राख्यी ज्यो। ईं मौके मुख्यमंत्री भजनलाल शर्मा न्यारी-न्यारी सरकारी योजनावां रो फायदो लेवण वाळां रा खाता मांय रकम भेजी अर न्यारा-न्यारा कार्यक्रमां री सरूआत कीनी। मुख्यमंत्री 20 हजार पिरवारां ने स्वामित्व कार्ड योजना रा तहत् पट्टा बांट्या। वे माटी कलाकारां ने बिजली ऊं चालण वाळा चाक अर दिव्यांगजन ने पावर ड्रिवन व्हील चेयर अर सहायक उपकरण ई दीना। ईं मौके मुख्यमंत्री गांवां रा विकास रा नुवा ई वर्क पोर्टल 2.0 अर मोबाइल एप री सरूआत ई कीनी। श्री शर्मा पण्डित दीन दयाल उपाध्याय गरीबी मुक्त ग्राम योजना, दादू दयाल घुमन्तु सशक्तिकरण योजना, मां योजना के तहत न्यू पैकेज, मां-नैत्र वाउचर योजना अर गुरू गोलवलकर आशान्वित ब्लॉक विकास योजना समेत न्यारी-न्यारी योजनावां ऊं जुड़्या दिशा-निर्देश जारी कीना। कार्यक्रम मांय मुख्यमंत्री भजन लाल शर्मा कह्यो के अन्त्योदय कल्याण री योजनावां माथे राज्य सरकार खास ध्यान दे रही है। श्री शर्मा कह्यो के सरकार पण्डित दीन दयाल उपाध्याय री अन्त्योदय री सोच ने आगे बधा रही है। वे जनता ऊं सरकारी योजनावां रो फायदो हर एक जणा तांई पूगावण सारू आगे आवण री अपील कीनी। राज्य स्तर रो ओ जळसो जिला स्तर माथे राख्यी ज्या कार्यक्रमां मांय ई सजीव बतायी ज्यो। मुख्यमंत्री ईं दौरान न्यारा-न्यारा ज़िलां मांय सरकारी योजनावां रो फायदो लेवण वाळां सागे वर्चुअल तरीका ऊं बातचीत ई कीनी। इण ऊं पैली श्री शर्मा गुरूवार ने जयपुर मांय पुलिस री डोढ़ सौ नुवी गाड़ियां ने हरी झंडी बतायी। आं मांय पुलिस थाणा री गाड़ी, फील्ड मांय जावण सारू पुलिस रा अहलकारां री गाड़ियां, हाईवे रेस्क्यू वाहन, मोबाइल इन्वेस्टिगेशन यूनिट अर ट्रूप कैरियर वाहन शामिल है। राजस्थान दिवस रा सिलसिला मांय पर्यटन विभाग री ओर ऊं जयपुर मांय सप्ताह भर तांई न्यारा-न्यारा कार्यक्रम राख्या जा रह्या है। आज जंतर-मंतर परां विशेष योग्य जन बच्चां सारू “देखो अपना शहर“ जागरूकता यात्रा निकाळी ज्यी। ईं मौके उपमुख्यमंत्री दिया कुमारी बच्चां सागे बातचीत कीनी। राजस्थान दिवस रा सिलसिला मांय चाल रह्या कार्यक्रमां री कड़ी मांय काल भीलवाड़ा मांय सुशासन समारोह अर 29 मार्च ने कोटा मांय युवा अर रोज़गार उत्सव राख्या जावेला। 30 मार्च ने राजस्थान दिवस रे मौके जयपुर मांय ज़ोरदार जळसो व्हेला, जद के 31 मार्च ने निवेश उत्सव मणायो जावेला।
000