राजस्थान दिवस रा सिलसिला मांय चाल रह्या कार्यक्रमां री कड़ी मांय थावर ने कोटा मांय मुख्यमंत्री रोजगार उत्सव अर युवा सम्मेलन राख्यी ज्यो। लोकसभा अध्यक्ष ओम बिरला अर मुख्यमंत्री भजनलाल शर्मा री मौजूदगी मांय व्ह्या ईं कार्यक्रम मांय 7 हजार 800 ऊं बत्ता नौजवानां ने नौकरी लागण रा कागज़ दिया ज्या। ईं सागे ई न्यारी-न्यारी सरकारी योजनावां रो फायदो लेवण वाळां ने रकम भेजी ज्यी। सरकारी स्कूलां रा विद्यार्थियां ने ई तीन सौ करोड़ रुप्या ऊं बत्ती रकम भेजी ज्यी। कार्यक्रम रे दौरान मुख्यमंत्री शिक्षित राजस्थान अभियान री सरूआत करी ज्यी अर स्किल अर युवा नीति रो विमोचन करी ज्यो। ईं सागे ई अटल ज्ञान केन्द्र, नशा मुक्ति केन्द्र अर गैर-सरकारी हलका मांय नौकरी-धंधा रा मौकां ऊं जुड़ी माली मदद री योजना अर द्रोणाचार्य पुरस्कार ऊं नवाज़ा जावण वाळां ने ज़मीं आवंटन रा बारा मांय ई हुकम जारी करी ज्या। मुख्यमंत्री भजन लाल शर्मा न्यारी-न्यारी सरकारी योजनावां रो फ़ायदो लेवण वाळां सागे वर्चुअल तरीका ऊं बातचीत ई कीनी। जळसा मांय श्री शर्मा कह्यो के नौजवान देश री बरकत री बुनियाद है। मुख्यमंत्री मोट्यारां ऊं प्रदेश ने विकसित बणावण सागे देश ने ई विकास रा गेला माथे ले जावण बाबत् कह्यो। जळसा मांय कोटा-बूंदी रा सांसद अर लोकसभा अध्यक्ष ओम बिरला कह्यो के प्रदेश री नुवी युवा नीति नुवा सपना अर नुवो नज़रियो दीनो है। वे कह्यो के ईं नीति रा तैत कौशल विकास रे ज़रिये हर गांव रा नौजवानां ने माली तौर ऊं खुद रे पाण ऊबा कर्या जावेला। ज़िला मुख्यालयां माथे ई थावर ने रोज़गार मेळा अर नौकरी देवण रा शिविर लगायी ज्या। जयपुर मांय मुख्यमंत्री भजनलाल शर्मा अमर जवान ज्योति ऊं रन फॉर फिट राजस्थान ने हरी झंडी बता र रवाना कीनी। दौड़ मांय मोटी तादाद मांय नौजवान, खिलाड़ी, एनसीसी रा कैडेट अर आम जनता सिरकत कीनी। ईं मौके राष्ट्रीय खेलां मांय तमगा जीतण वाळा खिलाड़ियां रो मान करी ज्यो अर अंतर्राष्ट्रीय स्तर रा नौ खिलाड़ियां ने ज़मीं रा आवंटन रा पट्टा दिया ज्या। ईं मौके मुख्यमंत्री कह्यो के सरकार खेलां ने बधावो देवण सारु बेहतरीन बुनियादी सुबीता विकसित कर रही है। वे कह्यो के प्रदेश रा गांवांई हलकां मांय ई खेलां रा विकास सारु स्टेडियम बणाया जा रह्या है। कार्यक्रम मांय खेल मंत्री कर्नल राज्यवर्द्धन राठौड़ कह्यो के प्रदेश मांय खेलां ने बधावो देवण सारु अंतर्राष्ट्रीय ओलम्पिक पोडियम री भांत योजनावां चलायी ज्यी है। थावर ने सगळा ज़िला मुख्यालयां माथे ई रन फॉर फिट राजस्थान राख्यी ज्यी। राजस्थान दिवस रा सिलसिला मांय राख्या जा रह्या कार्यक्रमां रा तैत थावर ने जयपुर मांय भक्ति प्रवाह संध्या राख्यी ज्यी है। जवाहर कला केन्द्र मांय राख्या जा रह्या ईं कार्यक्रम री थीम भक्ति से राष्ट्र भक्ति राख्यी ज्यी है। इण मांय पण्डित आलोक भट्ट वां रा साथी कलाकारां सागे कार्यक्रम पेश करेला। जवाहर कला केन्द्र मांय एक फोटो प्रदर्शनी ई लगायी ज्यी है। 28 मार्च ऊं चाल रही आ प्रदर्शनी 31 मार्च तांई देखी जा सके है। राजस्थान उत्सव रा तैत राख्या जा रह्या कार्यक्रमां री कड़ी मांय पर्यटन विभाग री ओर ऊं थावर ने अर दीतवार ने नेचर हाईक कार्यक्रम राख्यी ज्यो है। राजस्थान दिवस रे मौके काल राजधानी जयपुर रा अल्बर्ट हॉल माथे सांस्कृतिक कार्यक्रम राख्यो जावेला। राजस्थान दिवस रे मौके काल राज्य मांय सगळा स्मारकां अर संग्रहालयां ने सोहवणी रोशनी ऊं सजाया जावेला। ईं सागे ई लोक कलाकार कार्यक्रम पेश करेला। ईं मौके देसी-परदेसी सैलाणी संग्रहालयां ने मुफ्त मांय निरख सकेला। 31 मार्च ने जयपुर मांय निवेश सम्मेलन राख्यो जावेला।