राजस्थान दिवस रा सिलसिला मांय राख्या जा रह्या कार्यक्रमां री कड़ी मांय शुक्रवार ने भीलवाड़ा मांय राज्य स्तर रो विकास अर सुशासन उत्सव राख्यी ज्यो। जळसा मांय मुख्यमंत्री भजन लाल शर्मा विकास रा दस हजार करोड़ रूप्या रा न्यारा-न्यारा कामां री नींव रखी अर पूरा व्ह्या काम जनता ने सूंप्या। चित्रकूट धाम स्टेडियम मांय व्ह्या ईं जळसा मांय मुख्यमंत्री यूडीएच एलएसजी कानी ऊं डेलीगेशन रा हुकम , फायर एनओसी री प्रक्रिया आसान बणावण, नुवा बणायी ज्या ज़िलां मांय डीएमएफटी बणावण, हरित अरावली विकास परियोजना अर अन्नपूर्णा भंडार ऊं जुड़्या दिशा-निर्देश जारी कीना। श्री शर्मा हर ज़िला री पंच गौरव पुस्तिका रो विमोचन कीनो। ईं सागे ई ई-उपचार एप री सरुआत करी ज्यी अर पत्रकारां सारु स्वास्थ्य री योजना आर जे एच एस री सरुआत ई करी ज्यी। मुख्यमंत्री सरकारी योजनावां रो फायदो लेवण वाळां सागे वर्चुअल तरीका ऊं बातचीत ई कीनी। ई मौके मौजूद लोगां ने सम्बोधित करता थकां। श्री शर्मा कह्यो के सुशासन देश अर प्रदेश री बरकत री पूंजी व्हे है। मुख्यमंत्री कह्यो के चोखो राज वो ई व्हे है ज्यो जनता री उम्मीदां माथे खरो उतरे।न्यारा-न्यारा ज़िलां मांय ई कार्यक्रम राख्यी ज्या। आं ज़िला स्तर पर कार्यक्रमां मांय राज्य स्तर रो जळसो बतायी ज्यो। राजस्थान दिवस रा सिलसिला मांय राख्या जा रह्या कार्यक्रमां री कड़ी मांय शुक्रवार ने पाली मांय जिला प्रशासन अर रोज़गार कार्यालय री ओर ऊं रोजगार सहायता शिविर लगायी ज्यो। शिविर मांय मोटी तादाद मांय नौजवान पूग्या। शिविर मांय 15 कम्पनियां री ओर ऊं जरूरतमंद नौजवानां ने नौकरियां मुहैया करायी ज्यी। डूंगरपुर मांय लगायी ज्यो रोजगार शिविर मांय करीब 300 नौजवानां ने न्यारी-न्यारी कंपनियां री ओर ऊं नौकरी रा प्रस्ताव दिया ज्या। राजस्थान दिवस रा सिलसिला मांय काल कोटा मांय राज्य स्तर रो युवा अर रोजगार उत्सव राख्यो जावेला। इण मांय लोकसभा अध्यक्ष ओम बिरला अर मुख्यमंत्री भजन लाल शर्मा रो ई सिरकत करण रो कार्यक्रम है। ईं जळसा मांय सात हजार नियुक्ति पत्र ई दिया जावेला, जद के जिला मुख्यालय माथे रोज़गार मेळा अर नौकरियां देवण रा शिविर लगाया जावेला। राजस्थान दिवस रा सिलसिला मांय काल जयपुर मांय अमर जवान ज्योति ऊं रन फॉर फिट राजस्थान राख्यी जावेला।