राजस्थान दिवस रा सिलसिला मांय प्रदेश मांय राख्या जा रह्या न्यारा-न्यारा कार्यक्रमां री कड़ी मांय बुधवार ने बीकानेर मांय किसान सम्मेलन राख्यी ज्यो। इण मांय मुख्यमंत्री भजनलाल शर्मा प्रधानमंत्री किसान सम्मान निधि ऊं दी जावण वाळी रकम मांय बधोतरी अर मुख्यमंत्री थार सीमा क्षेत्र विकास कार्यक्रम समेत किसानां रा भला रा केई ऐलाण कीना। वे मंगला पशु बीमा योजना रो दायरो बधावण अर ढांढा-ढोरां रा स्वास्थ्य सारू मुफ्त दवाइयां अर टीकां री तादाद 138 ऊं बधा र 200 करण रो ऐलाण ई कीनो। प्राकृतिक खेती ने बधावो देवण सारु बळदां ऊं खेती करण ने बधावो देवण री योजना समेत पॉली हाउस, सौर पम्प, खेती-बाड़ी रा काम मांय आवण वाळा साज-ओ-सामान, कांदा रा भंडारण अर मधुमक्खी पालन ऊं जुड़ी 12 देजी योजनावां ई चलायी ज्यी। कार्यक्रम मांय मुख्यमंत्री 30 हजार किसानां ने 137 करोड़ रूप्या री सब्सिडी री रकम ई खातां मांय भेजी। श्री शर्मा न्यारी-न्यारी सरकारी योजनावां रो फ़ायदो लेवण वाळा किसानां ने मदद री रकम रा चैक ई दीना। ईं मौके वे कह्यो के किसानां रा पूरा कल्याण सारु सरकार भांत-भांत री योजनावां चला रही है।
राज्य स्तर रा ईं जळसा रो न्यारा-न्यारा जिलां मांय राख्यी ज्या जिला स्तर रा किसान सम्मेलनां मांय सीधो बतायी ज्यो। मुख्यमंत्री इण ऊं पैली किसान उत्पादक संगठन-एफपीओ मेळा अर प्रदर्शनी रो उद्घाटन कीनो। वे न्यारा-न्यारा जिलां मांय काश्तकारां ऊं वर्चुअल तरीका ऊं बातचीत ई कीनी। राज्य स्तर रा कार्यक्रमां री कड़ी मांय गुरूवार ने भरतपुर मांय गरीब अर अंत्योदय समारोह राख्यो जावेला। 28 मार्च ने भीलवाड़ा मांय सुशासन समारोह अर 29 मार्च ने कोटा मांय युवा अर रोज़गार उत्सव व्हेला। राजस्थान दिवस रे मौके 30 मार्च ने जयपुर मांय जोरदार जळसो अर 31 मार्च ने निवेश उत्सव राख्यो जावेला। राजस्थान दिवस महोत्सव री कड़ी मांय नई दिल्ली रा बीकानेर हाउस मांय गुरूवार ने नौ दिन रो राजस्थान उत्सव सरू व्ह्यो। मुख्यमंत्री भजन लाल शर्मा बुधवार ने इण रो विधिवत उद्घाटन करेला। इण मांय राजीविका क्राफ्ट मेळो अर फूड उत्सव राख्यो जा रह्यो है।