डॉक्टरां रे खिलाफ़ हिंसा रा मामला मांय छह घंटा री मियाद मांय संबंधित संस्थान री ओर ऊं एफ.आई.आर. करावणो जरूरी कर दियो ज्यो है। स्वास्थ्य सेवा महानिदेशक अतुल गोयल ईं बाबत् केंद्र सरकार रा अस्पतालां अर मेडिकल कॉलेजां रा मुखिया ने कागद लिख्यो है। कोलकाता मांय लारला दिनां एक डॉक्टर री हित्या रे खिलाफ रेजिडेंट डॉक्टरां रे काम परां नी आवण ने ध्यान राखता थकां ओ फैसलो करी ज्यो है। ईं वारदात रे खिलाफ प्रदेश रा डॉक्टर आज ई हड़ताल कीनी, ज्यीं कारण ईलाज रा काम माथे असर पड़्यो। बीकानेर मांय रेजीडेंट डॉक्टर्स मेडिकल कॉलेज ऊं कलेक्ट्रेट तांई रैली निकाळी। जयपुर मांय ई डॉक्टरां रे काम परां नी आवण रे कारण मरीजां ने घणी परेशानी रो सामो करणो पड़्यो। इंर् बीचे भारतीय चिकित्सा संघ काल संवारे छह बज्यां ऊं 24 घंटा सारू देश भर मांय गैर-आपातकालीन सेवा बंद राखण रो ऐलाण कीनो। चिकित्सा संघ रे मुजब सगळी जरूरी अर आपातकालीन सेवा जारी रहवेला।