प्रदेश रा न्यारा-न्यारा हलकां मांय जोरदार मेह बरस रह्यो है। लारला 24 घंटा मांय केई ठौड़ां भारी ऊं घणी भारी बिरखा दर्ज करी ज्यी। बूंदी ज़िला रा हिंडोली मांय सब ऊं बत्ती 220 मिलीमीटर बिरखा दर्ज करी ज्यी। अजमेर ज़िला रा मांगलियावास मांय 200 मिलीमीटर ऊं बत्तो पाणी बरस्यो। बीकानेर, अजमेर, नागौर, पाली, दौसा अर सवाईमाधोपुर ज़िलां मांय ई कठे-कठे जोरदार मेह बरस्यो। जयपुर कने जोबनेर मांय लारला दो दिन रे दौरान व्ही जोरदार बिरखा पाछे बाढ़ सरीखा हालात बण ग्या है। वठे प्रशासन री ओर ऊं राहत रा काम सरू कर दिया ज्या है। पाली ज़िला मांय ई केई ठौड़ां भारी बिरखा दर्ज करी ज्यी। हनुमानगढ़ ज़िला मांय आज ई हल्की ऊं मझला दर्जा री बिरखा रो दौर चालतो रह्यो। सवाईमाधोपुर ज़िला मांय लारला 24 घंटा मांय 118 मिली मीटर बिरखा मापी ज्यी। ब्यावर मांय ज़ोरदार बिरखा ने ध्यान राखता थकां 12वीं कक्षा तांई रा विद्यार्थियां सारू काल तांई छुट्टी रो ऐलाण कर दियो ज्यो है। जैसलमेर ज़िला रा केई हलकां मांय ई तेज़ बारिश व्ही है। मौसम केंद्र जयपुर रा निदेशक राधेश्याम शर्मा बतायो के आज जैसलमेर अर जोधपुर मांय भारी बारिश रो रेड अलर्ट जारी करी ज्यो है। बाड़मेर, बीकानेर, नागौर अर पाली ज़िलां सारू आज बिरखा रो ऑरेंज अलर्ट जारी करी ज्यो है।