राजस्थान ने अंगदान जागरुकता रा हलका मांय बेहतरीन काम सारू राष्ट्रीय स्तर माथे उत्कृष्टता पुरस्कार ऊं नवाज़ी ज्यो है। सोमवार ने नई दिल्ली मांय 16वां इंडियन आर्गन डोनेशन-डे समारोह मांय राजस्थान ने अंगदान संकल्प अभियान मांय अव्वल रेहवण परां केंद्रीय स्वास्थ्य राज्य मंत्री अनुप्रिया पटेल चिकित्सा शिक्षा विभाग री निदेशक डाॅ. रश्मि गुप्ता अर सोटो राजस्थान री निदेशक डाॅ. चित्रा सिंह ने ओ ईनाम दे र नवाज़ा। चिकित्सा मंत्री गजेन्द्र सिंह खींवसर ओ मान मिलण परो खुशी जाहिर कीनी। वे कह्यो के अंगदान सारू जागरुकता बधावण सागे असरदार जनसम्पर्क अभियान चलावण ऊं आ उपलब्धि हासिल व्हे सकी है। ईं बीचे देश मांय आधार सत्यापित अंगदान प्रतिज्ञा री तादाद पांच लाख ने पार कर ग्यी है। सोमवार ने नई दिल्ली मांय राख्यी ज्या 16वां भारतीय अंगदान दिवस समारोह मांय केंद्रीय स्वास्थ्य राज्य मंत्री अनुप्रिया पटेल आ जाणकारी दीनी। वे बतायो के लारला 10 साल मांय देश मांय हर साल 20 हजार ऊं बत्ता ऊपतू अंग लगायी ज्या। ईं मौके मंत्री अंगदान रा बारा मांय जाग जगावण रा मकसद ऊं एक साल तांई चलाया जावण वाळा जुग-जुग जियो अभियान री सरूआत कीनी। राज्यपाल हरिभाऊ बागडे़ ई कह्यो के “अंगदान” इंसानियत सारु खुद ने समर्पित कर देवण ऊं जुड़्यो महादान है। वे राजस्थान स्वास्थ्य विज्ञान विश्वविद्यालय मांय राख्यी ज्या अंगदान जागरूकता कार्यक्रम मांय बोल रह्या हा। श्री बागड़े कार्यकम मांय मौजूद लोगां ने अंगदान री शपथ दिरायी। भारतीय अंगदान दिवस रे मौके जनता मांय जाग जगावण रा मकसद ऊं प्रदेश मांय केई कार्यक्रम राख्यी ज्या। पाली मांय चिकित्सा विभाग अर सामाजिक संस्थावां री ओर ऊं अंगदान महादान जागरुकता रैली निकाळी ज्यी, जिण मांय शामिल व्हेवण वाळा अंगदान करण री सौगंध लीनी।