राजधानी जयपुर मांय भारत टैक्सी सेवा री परख सरू व्हे ग्यी है। सहकारी मॉडल माथे आधारित ईं सेवा ऊँ मुसाफिरां ने किफायती सफर रो सुबीतो मिलेला। एप आधारित ईं सेवा ने दूजी कैब कम्पनियां री तुलना मांय 10 ऊँ 15 फीसदी तांई कम भाड़ा वाळी मानी जा रही है। भारत टैक्सी मांय मुसाफिरां ऊँ बत्ती मांग वाळा टेम या बारिश री बगत बत्तो भाड़ो नी लियो जावेला। भारत टैक्सी सेवा मांय टैक्सी चलावण वाळां ऊँ कोई कमीशन नी लियो जावेला, जिण ऊँ वां री आमदनी मांय ई बधोतरी व्हे सकेला। फिलहाल आ सेवा सरुआती दौर मांय है अर आवता बगत मांय पूरा शहर मांय 24 ई घंटा टैक्सी रो सुबीतो मुहैया करावणो तैय करी ज्यो है। टैक्सी चलावण वाळा करीब 36 हजार जणां लारला एक महीना मांय जयपुर ऊँ भारत टैक्सी सारू नाम मण्डाया है जद के करीब 3400 गाड़ियां चालण लागी है।