भाई बहन रा प्रेम रो प्रतीक तिवांर राखी सोमवार ने मनायी जावेला। ईं सुं पैली आज बाजारां मांय राखीयां अर मिठाई खरीदबा खातर भीड़ देखी जा री है। राजधानी जयपुर मांय छुट्टी रे दिन आज बाजारां मांय खासी रौनक बण्योड़ी है। राखी माथे राजस्थान रोडवेज री कानी ऊं महिलावां ने मुफ्त यात्रा री सौगात दीरीजी है। आज आधी रात सुं प्रदेश री सीमा मांय वोल्वो अर एसी बसां ने छोड र सगळी रोड़वेज बसां मांय महिलावां रो सफ़र मुफ्त रैवेला। वठिने सीमा माथे तैनात जवानां ने राखी बांधबा जयपुर सुं रवाना व्ह्यो महिलावां रो दळ उत्तर काशी मांय आईटीबीपी जवानां ने राखी बांधी अर शुभकामनावां दी। दूजी कानी जैसलमेर मांय राखी रा पावन पर्व माथे जवाहर ज़िला सफाखाना मांय भर्ती सगळी महिला रोगियां ने जरूरत होबा माथे बगैर रिप्लेसमेंट रे खून मुहैया करयो जावेला। डूंगरपुर समेत प्रदेश री वीरांगनावां ने मुख्यमंत्री भजन लाल शर्मा इण बगत रक्षा बंधन संदेश भेज्या है। ज़िला री वीरांगनावां बहणां ने ज़िला कलेक्टर अर जनता रा नुमाइन्दा घरां पूगर संदेश पत्र अर दो हजार एक सौ रूप्या भेंट कर्या। जैसलमेर, भीलवाडा अर पाली ज़िला मांय भी शहीदां री वीरांगनावां ने नारियल अर शॅाल ओढार 2 हजार 1 सौ रूप्या री राशि अर मुख्यमंत्री भजन लाल शर्मा री संदेश पानड़ी सूपी ज्यी।