प्रदेश मांय राइजिंग राजस्थान प्री समिट मांय शुक्रवार ने 60 हजार करोड़ रुप्या ऊं बत्ता निवेश रा एमओयू प्रस्तावां माथे सही करी जावेला। प्री समिट मांय मुख्यमंत्री भजनलाल शर्मा ई मौजूद रेहवेला। खान विभाग रा प्रमुख शासन सचिव टी. रविकान्त बतायो के प्री-समिट ऊं पैली रोड़ शो अर दूजा आयोजनां मांय खान अर पेट्रोलियम सेक्टर मांय निवेश रा 77 हजार 721 करोड़ रुप्या रा एमओयू परां हस्ताक्षर कर्या जा चुक्या है। शुक्रवार ने व्हेवण वाळी प्री-समिट मांय खनन हलका रा 41 हजार करोड़ रुप्या ऊं बत्ता अर पेट्रोलियम सेक्टर रा 19 हजार करोड़ रुप्या ऊं बत्ता रा निवेश प्रस्तावां माथे राज्य सरकार अर निवेशकां बीचे एमओयू व्हेला। जयपुर जिला सागे जयपुर ग्रामीण अर दूदू ज़िलां रो जिला स्तर रो निवेशक सम्मेलन शुक्रवार ने जयपुर मांय राख्यो जावेला। जयपुर रा जिला कलेक्टर डॉ. जितेन्द्र कुमार सोनी बतायो के ईं सम्मेलन मांय 45 हजार करोड़ रुप्या रा 205 निवेश प्रस्तावां माथे सही करी जावेला। इण ऊं 2 लाख 6 हजार ऊं बत्ता लोगां ने नौकरी-धंधा रा मौक मिल सकेला। डॉ. सोनी बतायो के निवेश सारू ज़मीं आवंटन रे वास्ते सगळा उपखण्ड अधिकारियां ने उपलब्ध ज़मीं री जाणकारी देवण सारू पाबंद करी ज्या है। केकड़ी मांय ई शुक्रवार ने जिला स्तर री इन्वेस्टर मीट राख्यी जावेला। इण मांय तीन हजार करोड़ रुप्या ऊं बत्ता निवेश रा करार कर्या जावेला। ईं कार्यक्रम मांय उपमुख्यमंत्री अर जिला री प्रभारी मंत्री दिया कुमारी अर केंद्रीय कृषि राज्य मंत्री भागीरथ चौधरी रो ई शिरकत करण रो कार्यक्रम है। ईं बीचे श्रीगंगानगर मांय गुरूवार ने इन्वेस्टर मीट राख्यी ज्यी। इण मांय 3 हजार 51 करोड़ रुप्या रा 227 एमओयू व्ह्या। जिला कलेक्टर डॉ मंजू बतायो के ईं निवेश ऊं 5 हजार 600 ऊं बत्ता लोगां ने सीधा तौर ऊं अर 8 हजार 293 जणां ने अप्रत्यक्ष तौर ऊं नौकरी-धंधा मिल सकेला। ईं सम्मेलन मांय ज़िला रा पड़ौसी राज्यां अर प्रदेश स्तर रा कारोबारियां सागे ई पहली दफ़ा विदेश ऊं ई निवेश रा प्रस्ताव मिल्या।