राइजिंग राजस्थान ग्लोबल इन्वेस्टमेंट समिट-2024 रा तहत बुधवार ने प्रदेश मांय ‘जिला स्तर माथे राइजिंग राजस्थान समिट रा कार्यक्रम राख्यी ज्या। आं मांय करीब 300 इकाइयां सागे 37 हजार करोड़ रूप्या रा करार करी ज्या, ज्यां रे ज़रिए लगभग 39 हजार जणां ने नौकरी-धंधा रा मौका मिलेला। हनुमानगढ़ मांय राख्यी ज्या सम्मेलन मांय खाद्य अर नागरिक आपूर्ति मंत्री सुमित गोदारा री मौजूदगी मांय औद्योगिक संघां रा ओहदादार, वठे रा निवेशक, प्रवासी निवेशक, अहलकार अर उद्योग जगत री हस्तियां सिरकत कीनी। जिला स्तर री इन्वेस्टर मीट सारु हाल तांई 1447 करोड़ रुप्या रा 91 प्रस्ताव मिल्या है। आं निवेश प्रस्तावां ऊं 7 हज़ार ऊं बत्ता नौजवानां ने नौकरी-धंधा रा मौका मिल सकेला। सवाईमाधोपुर मांय राख्यी ज्या निवेशक सम्मेलन मांय ज़िला रा प्रभारी मंत्री गौतम कुमार दक निवेशकां ने सरकार री मदद रो भरोसो दिरायो। सम्मेलन मांय शिक्षा, स्वास्थ्य, खेती-बाड़ी अर बुनियादी ढांचा विकास समेत न्यारा-न्यारा हलकां मांय 1 हज़ार करोड़़ रुप्या ऊं बत्ती रकम रा 34 करार माथे सही करी ज्यी। आं रे ज़रिए 5 हज़ार ऊं बत्ता लोगां ने काम-धंधा रा मौका मिल सकेला। बाड़मेर मांय राख्यी ज्यी ज़िला स्तर री इन्वेस्टमेंट समिट मांय प्रभारी मंत्री जोराराम कुमावत अर वाणिज्य अर उद्योग राज्य मंत्री के. के. विश्नोई ई सिरकत कीनी। ईं मौके ज़िला रा खास उद्यमां, एमएसएमई अर हाथ रा कारीगरां कानी ऊं बणायी ज्या सामान री प्रदर्शनी लगायी ज्यी। जैसलमेर मांय राख्यी ज्यी जिला स्तर री राइजिंग राजस्थान इन्वेस्टर समिट मांय 76 औद्योगिक इकाईयां सागे 25 हजार करोड़ रूप्या ऊं बत्ती रकम रा करार करी ज्या, जिण ऊं 15 हजार ऊं बत्ता लोगां ने नौकरी धंधा रा मौका मिलेला। धौलपुर मांय राख्यी ज्यी इन्वेस्टमेंट समिट मांय गृह राज्य मंत्री जवाहर सिंह बेढ़म री मौजूदगी मांय 31 निवेशकां सागे करीब 607 करोड़ रूप्या रा करार करी ज्या। ईं मौके उद्योग विभाग री ओर ऊं डॉक्युमेंट्री फिल्म रो दरसाव ई करी ज्यो। बांसवाड़ा मांय राख्यी ज्या कार्यक्रम मांय 52 संस्थानां सागे करार करी ज्या। आं रे जरिये करीब 8 हजार 920 करोड रुप्या रो निवेश व्हेला, जिण ऊं 11 हजार 600 लोगां ने नौकरी-धंधा रा मौका मिलेला।झालावाड़ जिला मांय हाल तांई करार रा 35 प्रस्ताव मिल्या है, ज्यां ऊं 515 करोड़ रूप्या ऊं बत्ती रकम रा निवेश आवेला अर नौकरी-धंधा रा 2 हजार ऊं बत्ता मौका मिलेला।