जयपुर मांय सोमवार ऊं सरू व्हेवण वाळी राइजिंग राजस्थान ग्लोबल इन्वेस्टमेंट समिट सारू तैयारियां ने अंतिम रूप दियो जा रह्यो है। ईं सम्मेलण ने ध्यान राखता थकां जयपुर विकास प्राधिकरण शहर रा न्यारा-न्यारा हलकां ने रूपाळा बणावण रा काम सरू कीना है, ज्यां मांय खास सड़कां, सर्किलां अर चौराहां ने फुलवारियां ऊं सजाया जा रह्या है। सरकारी इमारतां ने रोशनी ऊं सजायी जा रही है। जयपुर विकास प्राधिकरण री आयुक्त आनन्दी बतायो के जयपुर शहर मांय अमर जवान ज्योति, स्टेच्यू सर्किल अर आम्बेडकर सर्किल समेत खास ठोड़ां अर चौराहां ने सजाया जा रह्या है। सजावट सागे जयपुर मांय हिफाज़त अर यातायात व्यवस्था रा बारा मांय ई जरूरी बन्दोबस्त कर्या जा रह्या है। सम्मेलण मांय सिरकत करण बाबत् आवण वाळां रा स्वागत सारु पर्यटन विभाग ई खास तैयारियां कीनी है। वां ने जयपुर री सैर करावण सारु 20 ऊं बत्ता गाइडां री फेहरिश्त बणायी ज्यी है। मेहमानां रा मनोरंजन सारु सैर-सपाटा री ठौड़ां लोक कलाकार कार्यक्रम पेश करेला। निवेशकां रा किट मांय पिंकसिटी टूर प्लान शामिल करी ज्यो है अर वां ने जयपुर मांय सैर-सपाटा री खास-खास ठौड़ां रो दौरो करावण सारु विशेष व्यवस्थावां करी ज्यी है।