भाई-बहन रा हेत रो प्रतीक रक्षा बंधन सोमवार ने रीत मुजब उमाव रे साथै मनायो जावे। ई मौके बहनां आप रा भाईयां री कलाई माथे रक्षा सूत्र बाध ने वां रा स्वास्थ्य अर समृद्धि री कामना कर री है। भाईयां कानी ऊं बहनां ने हिफाजत रा वचन रे साथै निजराना अर सगुन दे र रीत निभा रिया है। राष्ट्रपति द्रौपदी मुर्मू, उपराष्ट्र पति जगदीप धनखड़, प्रधानमंत्री नरेंद्र मोदी, राज्यपाल हरिभाऊ किसनराव बागड़े अर मुख्यमंत्री भजनलाल शर्मा राखी रा तिवार रे मौके शुभकामनावां दी है। प्रधानमंत्री सोशल मीडिया संदेश मांय कामना करी के ओ पवित्र तिवार रिश्तां मांय मिठास अर लोगां रा जीवन मांय सुख, समृद्धि अर सौभाग्य लावे। प्रदेशभर मांय रक्षा बंधन ने ले र लोगां मांय घणो उमाव देखीजे। बाजारां मांय राखी अर मिठाई मेवे खरीदण ने ले र तड़के ऊं ई चहल-पहल बण्योड़ी है। रक्षा बंधन माथे सरहद माथे तैनात जवानां री कलाईयां माथे राखी बांधण ने ले र केई संस्थावां अर संगठनां कानी ऊं कार्यक्रम राख्यी ज्या। लोकसभा अध्यक्ष ओम बिरला आज कोटा मांय कोरोना पीडित पिरवारां रे साथै रक्षा बंधन रो तिवार मनायो। श्री बिरला बहनां ने रक्षा बंधन री शुभकामनावां दी। जयपुर रा मोती डूंगरी गणेश मिंदर मांय भगवान रे चांदी री राखी बांधी ज्यी। बीकानेर मांय महिलावां अर स्कूली छात्रावां बी.एस.एफ. जवानां रे राखी बांध ने वां री लाम्बी उम्र री कामना करी। बाड़मेर मांय रक्षा बंधन माथे न्यारा-न्यारा संस्थावा कानी ऊं देश री हिफ़ाजत मांय तैनात जवानां ने राखी बांधी ज्यी अर देश री हिफ़ाजत सारू वां रो आभार जतायो। श्रीगंगानगर मांय हिन्दुमल कोट अर मदन लाल चौकी माथे महिलावां अर बालिकावां सैनिका रे राखी बांधी ई दौरान पौधा रोपण कार्यक्रम ही व्ह्यो। डीग रा प्रिय सखी संस्था कानी ऊं फिरोजपुर कैन्ट रा हुसैनीवाला बॉर्डर माथे जवानां सारू एक हजार एक राखियां भेजी ज्यी। चूरू मांय देश री हिफ़ाजत सारू शहीद व्ह्या जवानां री बहनां वां री मूरत रे राखी बांधी। प्रदेश री न्यारी-न्यारी जेळां मांय बंद कैदियां रे ई रक्षा सूत्र बांधण सारू घणी तादाद मांय बहणा पूगी। पाली अर झुन्झुनू मांय जेळ मांय बंद कैदी भाईयां सारू बहनां कानी ऊं राखी बाधण सारू जेळ प्रशासन कानी ऊं खास बन्दोवस्त करी ज्या। जैसलमेर मांय आज रक्षा बंधन रे मौके ज़िला अस्पताल मांय भर्ती महिला रोगियां ने बिना रिप्लेसमेन्ट रे रक्त मुहैया करायी ज्यो। ज़िला ऊं लगाती सरहद माथे देश री हिफ़ाजत मांय लाग्या जवानां री कलाई माथे रक्षा सूत्र बांध र बहनां देश री हिफ़ाजत रो वचन लियो। सवाईमाधोपुर, दौसा, सीकर अर भरतपुर मांय ई रक्षा बंधन हरक उमाव रे साथै मनाया जावण रा समचार है। करौली मांय रक्षा बंधन रे मौके लोगां पतंगबाजी रो आनन्द लियो। राजस्थान रोड़वेज कानी ऊं रक्षा बंधन रे मौके आज महिलावां ने मुफ्त जात्रा री सौगात दीरीजी है। आज रात 12 :00 बज्यां तांई वॉल्वो अर एसी बसां ने छोड र प्रदेश री सीमा मांय चालण वाळी सगळी रोड़वेज बसां मांय आ खास सुबिधा रहवेला मुफ्त सफर रो लाभ उठावण सारू बेगा संवारां ऊं ई बस ठेसणां माथे महिलावां री भीड़ दिखण लागी। जयपुर रां सिंधी कैम्प बस ठेसण माथे रोड़वेज प्रशासन कानी ऊं महिलावां सारू खास इन्तजाम करी ज्या है। महिला सुरक्षा ने ले र पुलिस प्रशासन सावचेती बणाया है। रक्षा बंधन माथे केई ठौड़ां नवाचार अर रीत निभाई जाय री है। पाली मांय सरोवर घाट माथे तरपण करी ज्यो अर शहीद स्मारक रो पूजन कर ने श्रिद्धांजलि दीरीजी। पुष्कर सरोवर मांय रक्षा बंधन माथे रीत मुजब हिमाद्री स्नान कर ने जनेऊं धारण करी ज्यी।