केन्द्रीय गृह मंत्री अमित शाह री मौजूदगी मांय आज यमुना जल परियोजना ने बणावण अर लागू करण ने लेर मेमोरेंडम आफ एग्रीमेंट-एम.ओ.ए. करीज्यो। आज नुई दिल्ली मांय ओ एम.ओ.ए. राजस्थान अर हरियाणा सरकार रे बीचे व्हियो। मीटिंग मांय केन्द्रीय जल शक्ति मंत्री सी.आर. पाटिल ई मौजूद रिह्या। एम.ओ.ए. माथे मुख्यमंत्री भजनलाल शर्मा अर हरियाणा रा मुख्यमंत्री नायब सिंह सैनी दस्तखत कर्या। ई मौके केन्द्रीय जल शक्ति मंत्री कह्यो करार रे तैत मानसून रे दौरान राजस्थान रा हक रो पाणी भूमिगत पाइपलेन री मार्फत हथिनीकुंड बैराज उ सप्लाई करयो जायेला। परियोजना री बणाई-चुणाई सारू कोई 3 हजार 900 करोड़ रुप्या री लागत ऊं हथिनीकुंड बैराज ऊं चूरू तायीं पाइपलेन बिछाई जायेला। इण उ पीवण रा पाणी रे साथे ई पाणत सारू पाणी री सुविधा मिलेला।
मुख्यमंत्री श्री शर्मा ई दिन ने भावनात्मक बतावतां कह्यो क ओ फगत एक करार नी है, बल्कि लाखों पिरवारां री सालां पुराणी आस, विश्वास अर संघर्ष री जीत है। वणा कह्यो क ओ ऐतिहासिक कदम राजस्थान रा विकास, पाणी री हिफाजत अर समृद्ध भविष्य रो नुओ पाठ लिखेला। ईण ऊं बेगा ही जमीं माथे काम सरू व्हे जायेला।