राज्य मांय नुवा पश्चिमी विक्षोभ रा असर ऊं आवता तीन दिन तांई केई ठौड़ां बारिश व्हेवण, घणी धुंअर रेहवण अर कठे-कठे ओला पड़बा रा आसार है। मौसम विभाग रे मुजब काल जोधपुर अर बीकानेर संभाग अर शेखावाटी हलका मांय कठे-कठे बादळां री गाज़ सागे हल्की बरसात री संभावना है। मौसम केन्द्र जयपुर के निदेशक राधेश्याम शर्मा बतायो के 11 जनवरी ने बीकानेर, जयपुर अर भरतपुर संभाग रा कुछ हलकां मांय बिरखा व्हेवण सागे कठे-कठे ओला ई पड़ सके है। ईं बीचे प्रदेश मांय गुरूवार ने ई केई ठौड़ां जो़रदार ठारी रो असर रह्यो। सीकर ज़िला रा फतेहपुर मांय कम ती कम तापमान 3 डिग्री सेल्सियस दर्ज करी ज्यो। चूरू, दौसा, करौली, बारां, सीकर अर सिरोही मांय ई न्यूनतम तापमान 5 डिग्री सेल्सियस ऊं नीचे रह्यो। इंर् सागे ई लगभग पूरा प्रदेश मांय न्यूनतम तापमान 10 डिग्री सेल्सियस ऊं नीचे रह्यो।