प्रदेश मांय आज सूं बिरखा री गतिविधियां मांय ओर बधोतरी होणे री आस है। मौसम केन्द्र जयपुर रे मुजब प्रदेश मांय एक नुवो तंत्र बणणे सूं पूर्वी राजस्थान मांय एक सप्ताह तांई भारी बरसात रो दौर जारी रेहणे रा आसार है।इण रे प्रभाव सूं आज कोटा अर उदयपुर संभाग मांय कठे-कठे भारी बिरखा होणे अर जयपुर, जोधपुर अर अजमेर संभाग रा केई भागां मांय हल्की सूं मध्यम बिरखा रा आसार है। केन्द्र राज्य रा 28 जिला मांय यलो अलर्ट जारी करयो है। राजधानी जयपुर मांय दोपहरा पाछे कई जगाहा माथे हल्की सूं मध्यम बिरखा दर्ज करीज्यी। श्रीगंगानगर जिले रा सूरतगढ खेतर मांय तेज बरसात व्ही। इण बीचे लारला 24 घंटा मांय पूर्वी राजस्थान मांय कठे-कठे अर पश्चिमी राजस्थान मांय कुछ एक ठोडा माथे बिरखा दरज करी ज्यी। वठीने, भरतपुर मांय व्ही तेज बरसात सूं जिला रा बांध बरेठा रो जल स्तर 28 फीट सूं ऊपर पहुंच गयो है। पाणी री लगातार आवक ने देखता व्ह्या आज बांध रो एक गेट खोल र पाणी री निकासी करी जा रही है। इणसूं बयाना अर रूपवास खेतर रे बहाव वाळे खेतरां रा गांवां मांय अलर्ट जारी कर्यो गयो है। विश्व प्रसिद्ध केवलादेव राष्ट्रीय पक्षी उद्यान मांय पांचना बांध सूं आया पाणी सूं पंछियां ने चौखो माहौल मिल रह्यो है। राजसमंद जिले रा प्रमुख जल स्त्रोत राजसमंद झील मांय पाणी री आवक लगोतार जारी है। झील रो जलस्तर बध र 17 दशमलव 60 फीट हो ग्यो है। टोंक जिले रा बीसलपुर बांध मांय भी पाणी री आवक चाल री है। आज दोपहरां बांध रो जल स्तर 314 दशमलव पांच-पांच आरएल मीटर दरज कर्यो गयो।