प्रदेश मांय आज ई केई ठोडां बिरखा व्हेवण रा समाचार है। जयपुर मांय दोपहर री बगत केई हलका मांय जोरदार मेह बरस्यो, जिण ऊं आवाण-जावण मांय परेशानी आयी। श्रीगंगानगर, सूरतगढ, श्रीकरणपुर, अनूपगढ अर रायसिंह नगर हलकां मांय ई चोखा मेह रा समाचार है। बांसवाड़ा मांय ई दोपहरां री बगत तेज बरसात व्ही। प्रदेश रा न्यारा-न्यारा बंधां मांय ई लगातार पाणी आ रह्यो है। डूंगरपुर जिला रा अमरपुरा बंधा माथे चादर चाल ग्यी है। मौसम विभाग इंर् सप्ताह चोखी बारिश रा आसार जताया है। महकमा रे मुजब कोटा अर उदयपुर संभाग मांय कठे-कठे भारी बारिश रा जदके जयपुर, जोधपुर अर अजमेर संभाग रा कुछ हलकां मांय मझला दर्जा री बिरखा री संभावना है। जोधपुर अर बीकानेर संभाग मांय कठे-कठे बिरखा व्हेवण रो अनुमान है। ईं बीचे दक्षिण मध्य रेलवे रा विजयवाड़ा मण्डल मांय भारी बारिश ऊं रायनपाडु टेशन माथे पाणी भर जावण रे कारण रेलां री आवण-जावण माथे असर पड्यो है। उत्तर-पश्चिम रेलवे रा मुख्य जनसम्पर्क अधिकारी कैप्टन शशि किरण बतायो के ईं कारण काल चेन्नई ऊं जयपुर सारू एक्सप्रेस रेलगाड़ी नी चालेला। ईं सागे ई जयपुर ऊं काल जावण वाळी कोयम्बटूर एक्सप्रेस ई रद्द कर दीरीजी है।