राज्य रा आथूणी हलकां मांय मॉनसून रो दौर बण्योड़ो है। अठे कुछ ठौड़ां माथे हलका ऊं मझला दर्जा री बिरखा व्ही। लारला 24 घंटा रे दौरान सब ऊं बत्ती 14-14 सेंटीमीटर बिरखा जैसलमेर रा नाचना अर लाठी मांय व्ही। पोकरण मांय 12, बीकानेर रा नोखा मांय 9, नागौर रा जायल मांय 8 सेंटीमीटर पाणी बरस्यो। जैसलमेर रा नाचना नहरी हलका मांय आज कदेई तेज तो कदेई रिमझिम बिरखा रो दौर चाले। टोंक रा बीसलपुर बांध मांय पाणी री आवक बण्योडी है। बन्धां रो जल थर 313 दशमलव एक एक आर.एल. मीटर व्हे ग्यो है। मौसम मेहकमां मुजब काले कोटा, भरतपुर, अजमेर, उदयपुर, जोधपुर अर बीकानेर संभागां मांय हल्का ऊं मुझला दर्जा री बिरखा री आस है। बीकानेर रा नोखा मांय आज सिंज्या चार बालिकावां री तलाब मांय डूब जावण ऊं मौत व्हे ग्यी। राणासर ताळाब मांय अ टाबरियां पाणी भरण गयी ही।