प्रदेश रा ऊगणी हलकां मायं आज ई मेह बरस्यो। लारला 24 घंटां मांय सब ऊं बत्ती 26 सेंटीमीटर बारिश दौसा ज़िला रा रामगढ़ पचवारा मांय व्ही। करौली ज़िला रा सपोटरा मांय 21 सेंटीमीटर, सवाईमाधोपुर अर लालसोट मांय 17-17, जयपुर मांय 13, अलवर रा कोटकासिम मांय 7, कोटा रा पीपलदा मांय 5, हनुमानगढ मांय 4 अर चूरू मांय 3 सेंटीमीटर पाणी बरस्यो। भीलवाड़ा शहर मांय आज दोपहरां री बगत तेज बिरखा व्ही। केकड़ी जिला मांय व्हे रही बिरखा ऊं छोटा-मोटा केई बंधा भर ग्या है, हालांकि बिरखा रे कारण नीचला हलकां मांय पाणी भर ग्यो अर आवण जावण मांय परेशानी व्ही। भरतपुर मांय रात ऊं सरू व्ही बिरखा आज ई चालती रही। मौसम केन्द्र जयपुर काल बारां, बूंदी, जयपुर, धौलपुर, दौसा, करौली, कोटा, सवाईमाधोपुर अर टोंक जिला मांय घणी जोरदार बिरखा रो रेड अलर्ट जारी कीनो है। अजमेर, अलवर, भीलवाड़ा, झालावाड़, झुन्झुनू अर सीकर मांय भारी बिरखा रो येलो अलर्ट जारी करी ज्यो है। महकमो जनता ने तळावां अर पाणी भरण री ठोड़ां कने नी जावण री राय दीनी है। मुख्यमंत्री भजनलाल शर्मा ईं जनता ऊं सावचेती राखण री अपील कीनी है। आपदा राहत मंत्री किरोड़ी लाल मीणा रो काल हिण्डौन, गंगापुरसिटी अर सवाईमाधोपुर मांय व्हे रह्या जोरदार मेह रे कारण पाणी भर्योड़ा हलकां रो दौरो करण रो कार्यक्रम है। दूजी कानी पैली वाळा मुख्यमंत्री अशोक गहलोत तेज बारिश रे कारण उपज्या हालात माथे सोशल मीडिया हेंडल एक्स रे जरिये चिंता जताई है। ईं बीचे घणी बिरखा वाळा जिला मांय बाढ़ नियंत्रण कक्ष माथे सावचेती बधा दीरीजी है अर एसडीआरएफ री टीमां ने अलर्ट राख्यी ज्यी है। सवाईमाधोपुर जिला रा मलारना डूंगर मांय ई जोरदार मेह बरस्यो। वठे दुर्गा सागर, राम सागर अर देलड़ा सागर तालाब माथे रपट चाल ग्यी है अर फलसावटा गांव रे चार ई मेर पाणी भर ग्यो है। मोरेल नदी मांय आ रह्या घणा पाणी रे कारण गंगापुर सिटी जावण वाळो गेलो बंद व्हे ग्यो है। सवाईमाधोपुर मांय आज संवारे व्ही जोरदार बिरखा रे कारण केई हलकां मांय पाणी भर ग्यो। म्हाणा खबरनवीस बतायो के सवाईमाधोपुर ने मध्य प्रदेश ऊं जोड़बा वाळा गेला माथे कुशाली दरा कने जोरदार पाणी बहतो निजर आयो। मुख्यमंत्री भजन लाल शर्मा जयपुर मांय व्हे रही जोरदार बिरखा रे कारण उपज्या हालात रो जायजो लेवण सारू न्यारा-न्यारा हलकां रो दौरो कर रह्या है। करौली मांय व्हे रह्या ज़ोरदार मेह ने ध्यान राखता थकां जिला रा प्रभारी सचिव आशुतोष ए.टी. पेडनेकर आज न्यारा-न्यारा हलकां रो दौरो कर र हालात रो जायज़ो लीनो। वे बिरखा रे कारण मुसीबत मांय पड्या लोगां सागे मुलाकात कर र हर संभव मदद रो भरोसो दिरायो। प्रभारी सचिव रसद विभाग रा अहलकारां ने खाण-पीण अर ईलाज रा जरूरी इंतजामात करण बाबत कह्यो। जिला री सरकारी अर गैर सरकारी स्कूलां मांय ई आठवी कक्षा तांई रा विद्यार्थियां सारू काल छुट्टी रो ऐलाण कर दियो ज्यो है। जयपुर री संभागीय आयुक्त डॉ आरुषि मलिक शहर रा न्यारा-न्यारा हलकां रो दौरो कर र हालात रो जायजो लीनो अर अहलकारां ने ज़रूरी हुकम दीना। ईं बीचे जयपुर कने कानोता बंधा मांय पांच जणां री मौत रा हादसा पाछे प्रशासन वठे जावण परां रोक लगा दीनी है। बंधा माथे फ़िलहाल चादर चाल रही है। ईं बीचे जयपुर कने गलता कुण्ड मांय आज दो जणां री डूब जावण रे कारण मौत व्हे ग्यी। दूजी कानी शिक्षा विभाग जयपुर री सगळी सरकारी अर गैर सरकारी स्कूलां मांय विद्यार्थियां सारू काल ई छुट्टी रो ऐलाण कर दीनो है।
000