मौजूदा विधानसभा रो तीजो सत्र ई शुक्रवार ने राज्यपाल हरिभाऊ बागड़े रा अभिभाषण सागे सरू व्हेला। श्री बागड़े राजस्थान विधानसभा मांय पहली दफा अभिभाषण देवेला। तीन फरवरी ऊं सदन मांय राज्यपाल रा अभिभाषण माथे बहस करी जावेला, जदके सात फरवरी ने मुख्यमंत्री भजनलाल शर्मा बहस रो जवाब देवेला। विधानसभा अध्यक्ष वासुदेव देवनानी कह्यो के सदन ने 40 दिन चलावणो तय करी ज्यो है। वे बतायो के सदन रो कामकाज कागज पेन बगैर करण अर इण ने नुवी तकनीक वाळो बणावण सारू नुवा कलेवर मांय तैयार करी ज्यो है। वे बतायो के सगळा विधायकां री सीटां माथे टेबलेट लगायी ज्या है। ईं सागे ई विधानसभा रो कामकाज डिजिटल तरीका ऊं करावण लायक बणावण बाबत विधायकां ने नेवा एप्लीकेशन री सिखावण दीरीजी है। ईं बीचे सत्र ऊं पैली गुरूवार ने मुख्यमंत्री भजन लाल शर्मा रा रहवास माथे भारतीय जनता पार्टी रा विधायक दल री मीटिंग व्ही, जिण मांय सत्र रे दौरान सरकार री रणनीति माथे चर्चा करीजी। दूजी कानी कांग्रेस रा विधायकां री मीटिंग सदन मांय विपख रा नेता टीकाराम जूली री सदारत मांय विधानसभा री नापक्ष लॉबी मांय व्ही।