मेवाड़ राजघराना रा आला सदस्य अर समाजसेवी महाराणा अरविन्द सिंह मेवाड़ दीतवार ने उदयपुर मांय देवलोक व्हे ग्या। वे थोडी टेम ऊं बीमार हा। वां रा निधन री सूचना सूं समुचा मेवाड़ हलका अर समर्थकां मांय दुख रो माहौल है। श्री मेवाड़ रा देवलोग व्हेवा माथे मुख्यमंत्री भजनलाल शर्मा, चिकित्सा मंत्री गजेन्द्र सिंह खींवसर अर केन्द्रीय मंत्री गजेन्द्र सिंह शेखावत समेत न्यारा न्यारा सामाजिक संगठन गहरो दुख जताया है। श्रीजी अरविन्द सिंह मेवाड़ महाराणा मेवाड़ चैरिटेबल फाउंडेशन, सिटी पैलेस अर एकलिंगजी ट्रस्ट समेत केई संस्थावां रा प्रबंधक हा। वणा शिक्षा, पर्यटन अर विरासत संरक्षण रा हलका मांय मेहतब जोग काम कर्यो। अरविन्द सिंह मेवाड़ रो काल अंतिम संस्कार कर्यो जावेला। वां री अंतिम यात्रा ऐतिहासिक सिटी पैलेस सूं सरू व्हे र शहर रा न्यारा न्यारा रास्ता सूं होती व्ही महासतिया पूगेला।