मुख्यमंत्री भजन लाल शर्मा कह्या के सरकार लारला एक बरस मांय महिलावां, मोट्यारा, काश्तकारां अर मजूरा समेत न्यारा-न्यारा वर्गा ने सम्बल देबा रो काम करयो है। दीतवार ने राज्य सरकार रा कार्यकाल रो एक बरस पूरो व्हे ग्यो है। इण मौके मुख्य केई कार्यक्रमां मांय सिरकत करी। श्री शर्मा अब सूं कुछ देर पैली जयपुर री पिंजरापोल गौशाला मांय अंत्योदय सेवा शिविर री सरूआत करी। मुख्यमंत्री कह्या के अन्त्योदय सेवा शिविर गरीबा अर वंचिता रा उत्थान खातर है। इण मौके मुख्यमंत्री 2 हजार दिव्यांगां ने स्कूटी अर 10 हजार विशेष योग्यजन ने कृत्रिम अंग अर उपकरण बाट्या। इण मौके श्री शर्मा दुर्लभ बीमारियों से पीडित टाबरा खातर मुख्यमंत्री आयुष्मान बाल संबल योजना अर ‘मुख्यमंत्री स्वनिधि योजना’ री शुरूआत भी करी। राज्य स्तरीय कार्यक्रम मांय मुख्यमंत्री विश्वकर्मा पेंशन योजना अर मुख्यमंत्री सद्भावना केन्द्र री भी लॉचिंग करी। प्रदेश रा न्यरा-न्यारा ज़िला मांय अन्त्योदय सेवा शिविर राख्या ग्या। इण सूं पैली मुख्यमंत्री दीतवार ने जयपुर रा जवाहर कला केन्द्र मांय सरकार रा एक बरस रा कार्यकाल ने समर्पित राज्य स्तरीय प्रदर्शनी रो उद्घाटन कर्या। इण मांय राज्य सरकार रा एक बरस रा कामकाज अर उपलब्धियां ने दर्शाया ग्यो। वठिने मुख्यमंत्री अमर जवान ज्योति माथे राख्या कार्यक्रम मांय पुलिस महकमां री केई गाड़िया ने हरी झंडी दिखा र रवाना कर्या। मुख्यमंत्री एस.एम.एस. सूं 101 एडवांस लाइफ सपोर्ट एम्बुलेंस, 25 पुलिस पेट्रोलिंग गाड़ियां अर 22 पुलिस इंटरसेप्टर गाड़ियां ने रवाना कर्या। इण दौरान वणा कालिका पेट्रोलिंग यूनिट री शुरूआत करी। इण सूं पैली मुख्यमंत्री दीतवार ने सुवांरे डीग ज़िला रा पूंछरी रा लौठा मांय न्यारा-न्यारा विकास कामां री नीव राखी। वे कह्या के गिर्राज जी री परिक्रमा खातर देशभर सूं बड़ी संख्या मांय सिरधालू आवे है। वां री सुविधा खातर राजस्थान री सीमा मांय आवा वाळां रास्ता ने विकसित कर्यो जावेला।गिर्राज जी रा परिक्रमां मार्ग ने विकसित करबा खातर वेदान्ता समूह कानी ऊं 100 करोड़ रूप्या री इमदाद दी जावेला।